Հենց Նաիրա Զոհրաբյանն է կողմ քվեարկել մարտի 1-ին արտակարգ դրություն մտցնելու որոշմանը. Լենա Նազարյան

Հենց  ԲՀԿ-ն և Նաիրա Զոհրաբյանն են սև PR անում` մեղադրելով, որ ՔՊ-ի ցուցակում կան մարդիկ, որոնք կապ ունեն իշխանության ներկայացուցիչների հետ: «Մենք ունենք նախկինում արձանագրված փաստեր, որ  «Ծառուկյան» դաշինքի 9 անդամներն են քվեարկել Սերժ Սարգսյանին վարչապետի ընտրության ժամանակ: Նրանք են կոալիցիայի մեջ եղել նախկին իշխանության հետ: Հենց Նաիրա Զոհրաբյանն է կողմ քվեարկել մարտի 1-ին արտակարգ դրություն մտցնելու որոշմանը: Եվ դեռ այսքանից հետո նրանք համարում են, որ մե՞նք ենք սև PR անում»,- ԱԺ ճեպազրույցների ժամանակ ասաց «Ելք» խմբակցության ղեկավար Լենա Նազարյանը:

Նազարյանն անձամբ կողմ է բանավեճերի անցկացմանը և չի կարծում, թե Հայկ Մարությանը խուսափում է Նաիրա Զոհրաբյանի առաջարկից. այս օրերին նա ամբողջ ժամանակն անցկացնում է վարչական շրջաններում, և  հավանաբար առավել կարևոր է համարում այդ հանդիպումները:

Դիտարկմանը, թե  Տարոն Մարգարյանն էլ էր նույն պատճառաբանությունը մեջբերում, «Ելք» խմբակցության ղեկավարը պատասխանեց, որ ինքը չի հիշում, որ Տարոն Մարգարյանը երբևէ այսպիսի հանդիպումներ ունեցած լիներ քաղաքացիների հետ: