Այս պահին Երևանում sett-weather
Փոխարժեքներ 25 11 2024
USD ⚊ $ 389.76
EUR ⚊ € 406.4
RUB ⚊ ₽ 3.79
GBP ⚊ £ 488.37
GEL ⚊ ₾ 142.31
կարևոր
0 դիտում, 5 տարի առաջ - 2019-02-15 22:30
Արցախ

Ստեփանակերտում կայացել է «Գիտական Արցախ» պարբերականի շնորհանդեսը

Ստեփանակերտում կայացել է «Գիտական Արցախ» պարբերականի շնորհանդեսը

Ստեփանակերտի «Վալլեքս Գարդեն» հյուրանոցային համալիրի կոնֆերենս դահլիճում այսօր տեղի է ունեցել «Արցախի երիտասարդ գիտնականների և մասնագետների միավորում» (ԱԵԳՄՄ) հասարակական կազմակերպության «Գիտական Արցախ» պարբերականի շնորհանդեսը, որը նվիրված է Հայաստանի Առաջին Հանրապետության 100-րդ, Արցախյան շարժման 30-րդ և «Էրեբունի-Երևանի» հիմնադրման 2800-րդ ամյակներին:

  «Արցախպրես»-ի  թղթակցի  հաղորդմամբ՝   միջոցառմանը   բացման   խոսքով  հանդես  է եկել  ԱԵԳՄՄ  հասարակական  կազմակերպության հիմնադիր Ավետիք  Հարությունյանն  ասել է, որ   «Գիտական Արցախ» պարբերականում  տեղ  են  գտել  աշխարհի  տարբեր  երկրների  ավելի  քան  յոթ  տասնյակ  երիտասարդ  և կայացած  գիտնականների  աշխատանքներ:
«Լիահույս  ենք, որ  տարիների  ընթացքում    հոդվածագիրները  կդառնան  Արցախի  գիտության դեսպաններ՝ միջազգային  տարբեր  հարթակներում  ներկայացնելով   ԱՀ  իրավունքներն  ու  շահերը:  ՀՀ  բարձրագույն  որակավորման  կոմիտեի  պահանջներին   համապատասխանող  այս   գիտական  պարբերականը  միջազգային  հարթակներում  գիտության  միջոցով Արցախը  ճանաչելի  դարձնելու  և  արցախյան  հիմնախնդիրն  օբյեկտիվ  տեսանկյունից  ներկայացնելու  առաքելություն  ունի»,- ավելացրել   է  Ա.  Հարությունյանը:
 
Շնորհանդեսին  Արցախի  պետական  համալսարանի   լրագրության  և  գրականության    ամբիոնի  վարիչ, ՀԿ  անդամ  Շուշան Խաչատրյանն էլ  ներկայացրել է  պարբերականի  կառուցվածքն  ու  բովանդակությունը:  Պարբերականի  խմբագրական  խորհրդի  նախագահը  Երևանի  պետական  համալսարանի (ԵՊՀ)  ռեկտոր, ՀՀ  գիտությունների  ազգային  ակադեմիայի  թղթակից  անդամ, պատմական  գիտությունների  դոկտոր, պրոֆեսոր  Արամ  Սիմոնյանն  է:
Նա ասել  է, որ  «Գիտական Արցախ» պարբերականի   առաջին համարում  տպագրվել  է  67  հոդված, որոնց  հեղինակներից   9-ը  գիտությունների  դոկտորներ են, 32-ը՝ գիտությունների  թեկնածուներ,  19-ը՝  ասպիրանտ  և  հայցորդ, իսկ 7-ը՝  փորձագետներ  և մագիստրոսներ:
««Գիտական Արցախ» պարբերականի   առաջին  համարում  տեղ  են  գտել   հայկական  արդի   հիմնախնդիրներից  մեկի՝  պետականության   վերաբերյալ   Հայաստանը, Արցախը, Ամերիկայի  Միացյալ  Նահանգները, Գերմանիան, Լեհաստանը  և  Բելոռուսը  ներկայացնող  հեղինակների  գիտական   աշխատանքներ: Գիտական  պարբերականում   զետեղված են նաև  ԱԵԳՄՄ  և  ԵՊՀ-ի  կողմից 2018  թվականի  սեպտեմբերի  13-16-ը  Ստեփանակերտում  համատեղ  կազմակերպված  «Հայոց  պետականության  անցյալը, ներկան  և  ապագան»  3-րդ  միջազգային   երիտասարդական  գիտաժողովի    լավագույն  գիտական  հոդվածները»,-մանրամասնել  է  Շ.  Խաչատրյանը:
 
Հայ  Առաքելական  եկեղեցու  Արցախի  թեմի    առաջնորդ   Պարգև  Արքեպիսկոպոս  Մարտիրոսյանը   ողջունել  է «Գիտական Արցախ» պարբերականի  լուսընծայմանը՝  մաղթելով  Արցախի   երիտասարդ  գիտնականների  մտքի նոր փայլատակումներ:
«Առանց  գիտության  առաջխաղացում   չի լինում ոչ մի տեղ:   Բացի  հոգևոր    և  քաղաքական  անվտանգությունից, մեզ  համար  շատ  կարևոր  է  նաև  գիտական  ոլորտը: Երիտասարդ   գիտնակաների  միավորման  գործում ԱԵԳՄՄ  հասարակական  կազմակերպությունը  մեծ առաքելություն  է  իրականացնում»,- մասնավորապես  ասել   է   Արցախի  թեմի    առաջնորդը:
ԱՀ  կրթության, գիտության  և  սպորտի   նախարար  Նարինե  Աղաբալյանը   ևս շնորհավորել է կազմակերպության անդամներին  նման պարբերականի  հրատարակման  համար՝  ասելով, որ  իր  կարծիքով  ներկայումս  լուրջ  փոփոխություններ  են  մտցվել գիտության  ոլորտում,   և   այդ    ոլորտը  ենթակա  է  արմատական  բարեփոխումների:
«Գիտությունն  այն  ասպարեզն   է, որտեղ շատ  խրախուսվում է  երիտասարդների  ակտիվությունը, բայց  շատ  կարևոր  է   նաև  այն   գիտնականների դերակատարությունը, ովքեր  իսկապես  ասելիք  ունեն  և, այստեղ   պետք  է    սերնդափոխության  գործընթացը  սահուն  ընթանա»,-նշել  է  Ն.  Աղաբալյանը:
բաժանորդագրվել
Նմանատիպ նյութեր

Լրահոս

  • բոլոր լուրերը

    • Հետադարձ կապ

    • Սոց. ցանցեր

    © 2024 Yerkir.am Բոլոր իրավունքները պաշտպանված են։

    Մեր կայքում տեղ գտած հրապարակումների հեղինակային իրավունքը պատկանում է բացառապես yerkir.am խմբագրությանը։ Այլ ԶԼՄ-ներում սույն կայքի հրապարակումներից որևէ մեկը ամբողջական վերահրապարակելու համար անհրաժեշտ է yerkir.am-ի խմբագրության համաձայնությունը: Լրատվամիջոցները կարող են yerkir.am-ից մեջբերումներ վերահրապարակել միմիայն հատվածաբար` պարտադիր օգտագործելով հիպերհղում:
    Գաղտնիության քաղաքականություն Կայքի հին տարբերակը