«Վրացական երազանք»-ը չի հրավիրվել Եվրահանձնաժողովի ֆորումին

«Վրացական երազանք»-ի կառավարությունը չի հրավիրվել ընդլայնման առաջին ֆորումին, որը կազմակերպել է Եվրոպական հանձնաժողովը, և անցկացվելու է Բրյուսելում նոյեմբերի 18-ին։

Այս տեղեկությունը Netgazeti-ի հարցին ի պատասխան հաստատել են Եվրոպական հանձնաժողովից։

Ընդլայնման հարցերով եվրահանձնակատար Մարտա Կոսը նոյեմբերի 18-ին Բրյուսելում կհյուրընկալի առաջին ընդլայնման ֆորումը՝ «Միության ամբողջականացում և մեր ապագայի ապահովում» կարգախոսով։

Ֆորումը կմիավորի ազգային և տարածաշրջանային առաջնորդներին, քաղաքացիական հասարակության ներկայացուցիչներին, ձեռնարկատերերին, արվեստագետներին և քաղաքական փորձագետներին ԵՄ ինստիտուտներից, անդամ պետություններից և ընդլայնման երկրներից։

«Ինտերակտիվ, ներառական և ապագային ուղղված ֆորումն արտացոլում է ընդլայնման գործընթացը ժողովրդին մոտեցնելու և Միության ապագայի մասին եվրոպական զրույց խթանելու ավելի լայն ջանքերը»,- նշված է հայտարարության մեջ։

Եվրոպական հանձնաժողովը հրապարակել է 2025 թվականի ընդլայնման զեկույցը, որը ներառում է Եվրամիությանը միանալու ձգտող 10 թեկնածու երկրների, այդ թվում՝ Վրաստանի տարեկան գնահատականը։

Զեկույցի համաձայն՝ Վրաստանի թեկնածուի կարգավիճակն այժմ միայն ձևական է։