Լույս է տեսել «ԳԻՏԱԿԱՆ ԱՐՑԱԽ» պարբերականի 2020 թ. 1-ին (4) համարը

Լույս է տեսել ՀՀ ԲՈԿ-ի ընդունելի հանդեսների ցանկում ընդգրկված «ԳԻՏԱԿԱՆ ԱՐՑԱԽ» պարբերականի 2020 թվականի 1-ին(4) համարը, որը նվիրված է Արցախի երիտասարդ գիտնականների և մասնագետների միավորման 5-ամյակին և բացվում է գլխավոր խմբագիր, իրավաբանական գիտությունների թեկնածու, դոցենտ Ավետիք Հարությունյանի նախախոսքով՝ «ԱԵԳՄՄ-ի հնգամյա երթը» խորագրով:

Համարում տեղ են գտել 30 հեղինակների 24 հոդվածներ և 1 գրքի գրախոսություն:

Հեղինակները ներկայացնում են Հայաստանի Հանրապետությունը, Արցախի Հանրապետությունը, Գերմանիան, Լեհաստանը և Ուկրաինան:
Նրանցից 7-ը գիտությունների դոկտոր է, 11-ը` գիտությունների թեկնածու, 12-ը` ասպիրանտ, հայցորդ ու մագիստրոս:

Ինչպես նշում է գլխավոր խմբագիր Ա. Հարությունյանը, պարբերականը, «ի թիվս այլ առաջնահերթությունների, «Գիտական Արցախ»-ը կոչված է միջազգային հանրությանը ներկայացնելու Հայաստանի ու Արցախի հիմնախնդիրների վերաբերյալ բացառապես օբյեկտիվ տեղեկատվություն և գիտության միջոցով Արցախը հանրահռչակելու արտերկրում: Այդ համազգային տեսլականով, հավաքական պատասխանատվությամբ, գիտական ուժերի համախմբումով հարկ է շարունակել պարբերականի հրատարակումը, պարբերական, որը պետք է դառնա ԱԵԳՄՄ-ի որդեգրած գիտության դիվանագիտության միջոցով Արցախի միջազգային ճանաչմանը նպաստող ռազմավարական ու մարտավարական յուրօրինակ ուղեցույցը»:

«Գիտական Արցախ»-ի սույն համարն արդեն հասանելի է Արցախի էլեկտրոնային գրադարանի կայքում: