Թուրքիան պարզաբանում է, թե ինչու է որոշել Ռուսաստանից գնել С-400 համակարգը

Թուրքիայի պաշտպանական արդյունաբերության վարչության ղեկավարի տեղակալ Ջելալ Սամի Թյուֆեքչին հայտարարել է, որ Թուրքիայի իշխանությունները սպառազինությունների ձեռք բերման հարցում ընտրություն են կատարել հօգուտ ռուսաստանյան С-400 զենիթահրթիռային համակարգերի այն պատճառով, որ ամերիկյան առաջարկի պայմանները բավարար շահավետ չեն եղել: Այդ մասին տեղեկացնում է aif.ru կայքը:

Նրա խոսքով` հենց Միացյալ Նահանգների քաղաքականությունն է դրդել Թուրքիային, որպեսզի որոշում կայացնի ձեռք բերել ռուսաստանյան С-400 համակարգը: «Բանակցությունների ընթացքում քննարկվող հարցը վերաբերում էր գնին, նաև այն հարցերին, թե որտեղ է այն արտադրվելու, ինչպես է իրականացվելու տեխնոլոգիաների փոխանցումը: Արդյունքում` ԱՄՆ-ն երկար ժամանակ չէր կարողանում վերջնական որոշում կայացնել ամերիկյան Patriot տեսակի զենիթահրթիռային համակարգի մատակարարման առաջարկի հարցի շուրջ: Որոշումը կայացվեց միայն նախորդ ամիս, սակայն արդեն ուշ էր»,- ասել է Թյուֆեքչին:

Նրա պարզաբանմամբ` Անկարան նախատեսում է, որ համակարգերի մատակարարումները կսկսվեն արդեն այս տարի:

Հիշեցնենք, որ Թուրքիային ռուսաստանյան С-400 զենիթահրթիռային համակարգերի մատակարարման վերաբերյալ վարկային համաձայնագիրը ստորագրվել էր 2017թ.: