«Իմ քայլի» պատգամավորներին հրահանգված է չխոսել

Ազգային ժողովում ավարտվել է «Իմ քայլը» խմբակցության մոտ 4 ժամ տևած նիստը, որին մասնակցել է վարչապետ Նիկոլ Փաշինյանը։ Խմբակցության նիստը դռնփակ է եղել, լրագրողները հնարավորություն չեն ունեցել ներկա գտնվելու: 

«Իմ քայլը» խմբակցության պատգամավոր Շիրակ Թորոսյանն լրագրողների հետ զրույցում նշեց, որ վարչապետ Նիկոլ Փաշինյանի հետ հանդիպմանը քննարկել են կառավարությանը, խորհրդարանին և լայն հանրությանը հուզող հարցեր:

«Բոլոր խնդիրներին, որոնք վերջին օրերին հանրությանը հետաքրքրել են, անդրադարձ եղել է»,-ընդգծեց նա:

Դիտարկմանը, որ «Իմ քայլլի» պատգամավորներին հրահանգված է չխոսել, Թորոսյանը պատասխանեց.

«Ասեցի այնքանը, ինչքանն իրավասու եմ ասել»:

«Իմ քայլը» խմբակցության պատգամավոր Նիկոլայ Բաղդասարյանը ևս լրագրողների հետ զրույցում չգաղտնազերծեց քննարկված հարցերը:

Պատգամավոր Հովիկ Աղազարյանն էլ միայն տեղեկացրեց, որ վարչապետը Դավոսի հետ կապված տեղեկություններ է ներկայացրել, իսկ երկուշաբթի կառավարության ծրագիրը ոչ վերջնական տարբերակով կբերվի ԱԺ: