«Գոյը» Նժդեհից է խոսում, իսկ «Խաղաղության խաչմերուկը» պահանջում է չխոսել․ Գագիկ Գինոսյան

«Գոյ» թատրոնի ստեղծագործական անձնակազմը բողոքի ակցիա է իրականացնում ԿԳՄՍՆ-ի դիմաց՝ ընդդեմ կառավարության որոշման, որով Արմեն Մազմանյանի անվան բեմարվեստի ազգային փորձարարական ԳՈՅ կենտրոն ՊՈԱԿ-ը վերակազմակերպվելու է՝ միանալով Գ. Սունդուկյանի անվան ազգային ակադեմիական թատրոն ՊՈԱԿ-ին:

Ըստ թատրոնի անձնակազմի՝ թատրոնի նորանշանակ տնօրեն` Կարեն Սիմոնյանը ԿԳՄՍ նախարարության կողմից հրավիրված այսօրվա  նիստի ժամանակ պատրաստվում է ստորագրել Գոյ թատրոնը Սունդուկյան թատրոնին «միացման» փաստաթուղթը:

Ստեղծագործական անձնակազմի ակցիային միացել էին նաև հանրային ու մշակութային այլ գործիչներ․ «Կարին» ավանդական երգի, պարի համույթի ղեկավար Գագիկ Գինոսյանն ասաց որ «Գոյ»-ը հզոր ասելիք ունի, իր ներկայացումներով մեզանում ջնջում է պարտվողական հոգեբանությունը։ «Գոյը» Նժդեհից է խոսում, իսկ «Խաղաղության խաչմերուկը» պահանջում է չխոսել»,-ասաց Գագիկ Գինոսյանը՝ վստահեցնելով․ «Վերածնունդը լինելու  է»։