Հոլանդացի լրագրողին «անվտանգության նկատառումներով» արտաքսել են Թուրքիայից

Հոլանդացի լրագրող Էնս Բոերսմանն արտաքսվել է Թուրքիայից։

Ըստ BBC-ի` հոլանդական «Het Financieele Dagblad» թերթի` Թուրքիայի թղթակիցն այդ երկրում աշխատում էր 2017 թվականից, իսկ նախորդ շաբաթ Թուրքիայում լրագրողական վկայական էր ստացել։

Լրագրողը կացության ժամկետը երկարացնելու նպատակով դիմել է համապատասխան մարմիններին, սակայն նրան ձերբակալել են` պահանջելով երկիրը լքել «անվտանգության նկատառումներով»: Նրան անգամ թույլ չեն տվել վերադառնալ տուն և վերցնել իր իրերը։

Դեպքին արձագանքել է «Het Financieele Dagblad»-ի գլխավոր խմբագիր Ժան Բոնժերը` նշելով, որ ապշած են կատարվածից: «Չափազանց ցավալի է, որ Թուրքիայում լրագրողները չեն կարողանում ազատորեն կատարել իրենց աշխատանքը», - ասել է նա` տեղեկացնելով, որ պատրաստվում են իրավաբանորեն պայքարել այդ որոշման դեմ։