ՌԴ քաղաքացի հայերը կարող են Ադրբեջանի դեմ դատական հայց ներկայացնել. Եվսեև

ԱՊՀ երկրների ինստիտուտի տնօրենի տեղակալ Վլադիմիր Եվսեևը Русарминфо-ին տված հարցազրույցում խոսել է ՌԴ քաղաքացի հայերի՝ Ադրբեջան մուտքի արգելքի մասին:

Հիշեցնենք, որ օրերս ՌԴ ԱԳՆ պաշտոնական ներկայացուցիչ Մարիա Զախարովան ասել էր, որ ազգային հատկանիշով ՌԴ քաղաքացիների ձերբակալությունը և արտաքսումը նրանց իրավունքների կոպիտ խախտում է: Ադրբեջանի ԱԳՆ-ն նման հայտարարույթյունը երկկողմ ռազմավարական համագործակցության ոգուն հակասող համարեց:

Եվսեևի կարծիքով՝ Բաքուն պաշտոնական մակարդակով չի արգելի հայկական ծագում ունեցող ՌԴ քաղաքացիներին մուտք գործել երկրի տարածք, սակայն գործնականում այդ արգելքը կշարունակի կիրառվել: Ըստ փորձագետի` Ադրբեջանի գործողություններին ի պատասխան, ՌԴ-ն, ամենայն հավանականությամբ, որևէ ադեկվատ քայլ չի ձեռնարկի շատ պատճառներով:

«Դա չի նշանակում, որ Ռուսաստանը վախենում է որևէ մեկից, Ռուսաստանը ոչ ոքից չի վախենում: Ռուսաստանի տարածքում կան հսկայական քանակությամբ ներգաղթյալներ Ադրբեջանից, և ցանկացած տեսակի արգելքի սահմանումը կարող է ներքաղաքական լուրջ խնդիրների հանգեցնել Ադրբեջանում, ինչին Ռուսաստանը  չի գնա: Ռուսաստանը չի ցանկանում իր սահմաններին մոտ գտնվող որևէ երկրի ապակայունացում», - ասել է նա:

Եվսեևը նաև հավելել է, որ  ՌԴ քաղաքացի հայերը նման իրավիճակում հայտնվելու դեպքում  կարող են դիմել Մարդու իրավունքների դատարան: