Բաքուն Արցախում գործի է դրել Սիրիայում ԻՊ-ի կիրառած անօդաչուների նման սարքեր. Վլադիմիր Եվսեև

Ադրբեջանն Արցախում հայկական դիրքերի վրա հարձակման ժամանակ կիրառել է ինքնաշեն անօդաչու սարքեր, որոնք շատ նման են եղել Սիրիայի «Հմեյմիմ» և «Տարտուս» ռուսական ռազմաբազաների վրա հարձակման ժամանակ ԻՊ-ի գործի դրած անօդաչուներին: Նման կարծիք Русарминфо-ի հետ զրույցում  հայտնել է ԱՊՀ երկրների ինստիտուտի տնօրենի տեղակալ Վլադիմիր Եվսեևը:

«Այդ անօդաչու սարքերը ստեղծվել են թուրքական հատուկ ծառայությունների պատվերով: Կարծում եմ, որ թուրքական հատուկ ծառայությունները մասնակցել են Սիրիայում ռուսական բազաների ուղղությամբ հարվածներին, այնուհետև փոխանցել են հարվածների իրականացման կառուցվածքը և տեխնիկան Ադրբեջանին: Դա ցույց է տալիս, թե ով է իրականում կանգնած եղել ռուսական ռազմաբազաների ուղղությամբ հարվածների հետևում»,- ասել է նա:

Եվսեևի խոսքով՝ Արցախում նման անօդաչու սարքերի արդյունավետությունը շատ ցածր է, քանի որ կոնկրետ թիրախների ուղղությամբ հարվածներ հասցնելու հնարավորություն չկա:

Նա նաև նշել է, որ նման անօդաչու սարքեր խոցելու ամենաարդյունավետ միջոցը ռուսական «Պանցիր» համակարգն է, և Երևանը պետք է Մոսկվայի առջև հարց դնի «Պանցիր» համակարգերի մատակարարումների մասին:

Հիշեցնենք, որ Ադրբեջանի զինուժը հունվարի 20-ին Արցախում հայկական դիրքերի վրա ական էր նետել անօդաչու սարքից: