Երևան-Էջմիածին ճանապարհը բաց է, ակցիան կշարունակվի երկուշաբթի

Երկար բանակցություններից հետո Մանվել Գրիգորյանին ազատ արձակելու որոշման դեմ պայքարող քաղաքացիները բացել են Երևան-Էջմիածին ճանապարհը:

Ավելի վաղ «Իմ քայլը» խմբակցության պատգամավոր Հայկ Սարգսյանը տեղեկացրել էր՝ շատ հավանական է, որ Մանվել Գրիգորյանը երկուշաբթի կրկին կալանավորվի և ցուցարարներին առաջարկել էր  ակցիան կազմակերպել երկուշաբթի օրը՝ ՀՀ Վերաքննիչ դատարանի դիմաց. «Ես էլ կմիանամ ձեզ»։

Հիշեցնենք, որ այսօր վաղ առավոտից էջմիածինցիները բողոքի ակցիա են իրականացնում «Զվարթնոց» օդանավակայան տանող ճանապարհի սկզբնամասում: Նրանք, ինչպես երեկ, պահանջում են անհապաղ կալանավորել Մանվել Գրիգորյանին։

Հավելենք, որ Մանվել Գրիգորյանին գրավի դիմաց ազատ արձակելու դատարանի որոշման դեմ վերաքննիչ բողոք է ներկայացրել ՀՀ գլխավոր դատախազությունը: Միջնորդությունը քննվում էր երեկ, սակայն դատական նիստը հետաձգվեց: