Հայ Դատի երիտասարդ գործիչները հանդիպել են նորընտիր Կոնգրեսի անդամների հետ

Ամերիկայի Հայ Դատի հանձնախումբը տեղեկացնում է, որ Հայ Դատի նոր սերնդի մի շարք ներկայացուցիչներ, փորձառու գործիչների ուղեկցությամբ, հանդիպել են ԱՄՆ նորընտիր` 116-րդ Կոնգրեսի անդամների հետ` ծանոթանալով հայության իրավական պաշտպան Սենատի և Ներկայացուցիչների պալատի անդամների հետ:

Նյու Ջերսիի Հայ Դատի հանձնախմբի անդամ Անի Չաղլասյանը հայտնել է, որ պատվիրակության մաս են կազմել երկրորդական վարժարանների և համալսարանների ուսանողներ, ինչպես նաև Համազգայինի, Հայ երիտասարդական միության և Հայ մարմնակրթական ընդհանուր միության անդամներ:

Հայ Դատի պատվիրակության անդամներն իրենց այցելության ընթացքում խորհրդակցություններ են ունեցել նաև կոնգրեսականների գրասենյակների հայ պաշտոնատարների և Հայ Դատի վարժողական ծրագրերի շրջանավարտների հետ:

Նշենք, որ 116-րդ Կոնգրեսի անդամների թվում է ԱՄՆ Հայ Դատի հանձնախմբի աջակցությունը վայելող ավելի քան 250 կոնգրեսական, որոնցից 90-ը նոր անդամներ են: