Ղազախստանի ՆԳՆ-ն մեկնաբանել է Կարագանդայում կատարված սպանության գործով հայազգի կասկածյալի տեսաուղերձը

Ղազախստանի ՆԳՆ-ն մեկնաբանել է տեսաուղերձը, որը հղել էր հունվարի 1-ին Կարագանդայում կատարված սպանության գործով հետախուզման մեջ գտնվող հայազգի կասկածյալ Գուրուրյանը.  հայտնում է NUR.KZ-ն:

Երկրի ՆԳՆ ներքին ու արտաքին կապերի վարչության պետ Ալմաս Սադուբաևի խոսքով` ներկայումս այդ գործով ձերբակալվել է 8 մարդ, իսկ Գուրուրյանը հետախուզման մեջ է:

«Հետախուզման գործի շրջանակում ոստիկանները եղել են նրա հնարավոր գտնվելու վայրերում: Համացանցում նրա տեսաուղերձի հայտնվելուց ու իրավապահներին հանձնվելու պատրաստակամություն հայտնելուց հետո` 2 օր առաջ, կասկածյալի հարազատներին են փոխանցվել մեր աշխատակիցների կոնտակտները: Սակայն առ այսօր որևէ մեկը կապի դուրս չի եկել»,- նշել է Սադուբաևը:

Նրա խոսքով` ՆԳՆ-ն երաշխավորում է գործի օբյեկտիվ, համապարփակ հետաքննություն:

Նշենք, որ կասկածյալը ուղերձում նշել է, որ մարդասպան չէ: