Լուկաշենկոն ասել է, որ պետք չէ իրենց նախատել Ադրբեջանին զենք վաճառելու համար

Բելառուսի նախագահ Ալեքսանդր Լուկաշենկոն այսօր ռուսաստանցի լրագրողների հետ հանդիպման ժամանակ ասել է, որ պետք չէ իրենց նախատել Ադրբեջանին զենք վաճառելու համար. հայտնում է Белта-ն:

Նա մանրամասնել է, որ  «Պոլոնեզ» հրթիռային համալիրի փորձարկմանը հրավիրել է և’ հայերին, և’ ադրբեջանցիներին, և’ ռուսաստանցիներին:

«Ադրբեջանցիները խնդրել են, որ վաճառենք, իսկ մենք պետք է վարկ վերադարձնենք, որը վերցրել ենք դրա համար: Եվ ես ասացի, որ կվաճառեմ ադրբեջանցիներին: Եվ հայերին եմ առաջարկել նմանատիպ համալիր: Հայերը հրաժարվեցին` ասելով, որ ռուսական «Իսկանդեր» ունեն, որը շքերթի ժամանակ ցուցադրել են: Եվ մենք ադրբեջանցիների խնդրանքով նրանց շքերթի համար համալիր ստեղծեցինք: Հավանաբար,  դրանում է իմ մեղքը, որ աշխատեցի այդ  շքերթի համար համալիրն անել: Սակայն ես առաջարկել էի նաև հայերին, նրանք ասացին, որ հարկավոր չէ»,- ասել է Բելառուսի նախագահը:

Լուկաշենկոն հավելել է, որ, անկախ ամեն ինչից, ինքը լավ է վերաբերվում  բոլոր երկրներին, այդ թվում` Հայաստանին և հայերին: