Մանվել Գրիգորյանի մոտ արձանագրել ենք առողջական և հոգեբանական վիճակի բացասական դինամիկա. ՄԻՊ

ՄԻՊ գրասենյակի աշխատակիցները, այդ թվում` նաև բժիշկը պարբերաբար այցելում են ԱԺ պատգամավոր, գեներալ Մանվել Գրիգորյանին. լրագրողների հետ զրույցում ասաց ՀՀ մարդու իրավունքների պաշտպան Արման Թաթոյանը:

Նա տեղեկացրեց, որ Գրիգորյանին ինքը վերջին անգամ այցելել է մոտ մեկ շաբաթ առաջ: «Առանձնազրույց ենք ունեցել և դրա արդյունքներով գրություններ ենք ուղարկել թե'  քրեական հետապնդման իրավապահ մարմիններին, թե' արդարադատության նախարարություն»,- ասաց ՄԻՊ-ը:

Թաթոյանը նշեց, որ ամենօրյա կապի մեջ են փաստաբանների հետ, նաև ասաց, որ չի կարող հրապարակել բժշկական գաղտնիքին վերաբերող մանրամասներ, սակայն ընդգծեց. «Կարող եմ ասել, որ արձանագրել ենք առողջական և հոգեաբանական վիճակի բացասական դինամիկա»:

Հիշեցնենք, որ Մանվել Գրիգորյանը կալանավորվել է հունիսի 19-ին`Երևանի ընդհանուր իրավասության դատարանի դատավոր Մարինե Մելքոնյանի որոշմամբ: Գրիգորյանին մեղադրանք է առաջադրվել ապօրինի կերպով ռազմամթերք ձեռք բերելու և կնոջ` Նազիկ Ամիրյանի, դստեր` Այծեմնիկ Գրիգորյանի, Էջմիածին քաղաքի բնակիչներ Սեյրան Ազարյանի, Արմեն Հակոբյանի և այլ անձանց հետ նախնական համաձայնությամբ իրեն պատկանող առանձնատներում պահելու համար, ինչպես նաև՝ մի խումբ անձանց հետ նախնական համաձայնությամբ յուրացման եղանակով իր վստահությանը հանձնված առանձնապես խոշոր չափի ուրիշի գույք հափշտակելու համար:

Մանվել Գրիգորյանի կալանքը երկու ամսով երկարացվեց դեկտեմբերի 12-ին: