Լիբերմանի հրաժարականը չի հանգեցնի Իսրայելի ներքաղաքական լուրջ լարվածության. Կարեն Վերանյան

«Նորավանք» հիմնադրամի Քաղաքական հետազոտությունների կենտրոնի ղեկավար, ավագ փորձագետ Կարեն Վերանյանը պատասխանել է Yerkir.am-ի հարցերին:

-Պարոն Վերանյան, ինչպե՞ս կազդի Լիբերմանի հրաժարականն Իսրայելի կոալիցիոն կառավարության ճակատագրի վրա, հաշվի առնելով այն փաստը, որ նա հայտարարել է իր կուսակցության՝ կոալիցիոն կառավարությունից դուրս գալու մասին։ Կգնա՞ արդյոք Իսրայելը դեպի արտահերթ խորհրդարանական ընտրությունների։

- Չեմ կարծում, որ Լիբերմանի հրաժարականը կհանգեցնի այդ երկրի ներքաղաքական լուրջ լարվածության: Կոալիցիոն կառավարությունից Լիբերմանի գլխավորած «Մեր տունն Իսրայելն է» կուսակցության դուրսգալով այլևս նախկին պաշտպանության նախարարը մտադիր է գնալ արտահերթ խորհրդարանական ընտրությունների ճանապարհով:

 Միևնույն ժամանակ, սակայն, շատ բան կախված է նաև կոալիցիոն կառավարության մյուս իշխանական թևից, որը ներկայացնում է Լիկուդ կուսակցությունը` վարչապետ Նեթանյահուի գլխավորությամբ:

 Իվերջո, կոալիցիոն կառավարությունում ստեղծված իրավիճակը պայմանավորված է իշխանական թևերի միջև երկխոսության հնարավորությունից, հակառակ դեպքում, Լիբերմանն իր կուսակցությունով կարող է անցնել ընդդիմություն:

 Այդ առումով կարևոր է ընդգծել, որ Նեթանյահուն ու Լիբերմանն ունեն քաղաքական համագործակցության բավական երկար ու լուրջ փորձառություն` լի հակասություններով ու դրանց հաղթահարման ռեսուրսներով, ուստի, այս անգամ ևս կողմերը կարող են գտնել իրավիճակից դուրս գալու հնարավորինս արդյունավետ ճանապարհ:  Ավելին, կոալիցիոն կառավարությունից Լիբերմանի գլխավորած կուսակցության դուրս գալու դեպքում նույնիսկ Նեթանյահուն կշարունակի ստանալ Քնեսեթում պառլամենտական մեծամասնության աջակցությունը:

 Կարծում եմ, որ կոալիցիոն կառավարության պատասխանատուները արտահերթ ընտրությունների ճանապարհով գնալու հարցում առանձնակի ուշադրություն կդարձնեն արտաքին մարտահրավերներին և մասնավորապես Գազայի հատվածում ստեղծված բավական թեժ ռազմական իրադրության հանգամանքին, որպեսզի երկրի ներքաղաքական իրավիճակը զերծ մնա քաղաքական հնարավոր ցնցումներից:  Նշեմ նաև, որ պաղեստինյան կողմին գոհացնում են Լիբերմանի հրաժարականը և դրան հաջորդող տարաձայնությունները, որոնք կան Իսրայելի կոալիցիոն կառավարությունում:

- Լիբերմանի հրաժարականին հետեւող ներիսրայեծական քաղաքական զարգացումները ինչպե՞ս են կարող ազդել Մերձավոր Արեւելքի իրադարձությունների վրայ՝ ընդհանրապես, իսկ պաղեստինա֊իսրայելական խաղաղության բանակցությունների վրա՝ հատկապես։

- Նախ` Լիբերմանը հանդիսանում է պաղեստինա-իսրայելական հակամարտության հարցում ամենակոշտ դիրքորոշմամբ աչքի ընկնող իսրայելցի քաղաքական գործիչներից մեկը:  Երկրորդ` սա հնարավորություն կտա պաղեստինյան կողմին մոբիլիզացնել քաղաքական, ռազմական ռեսուրսները:  Ի դեպ, Լիբերմանի հրաժարականը պայմանավորված էր նրանով, որ Նեթանյահուն համաձայնել է Գազայի հատվածում կրակի դադարեցմանը, ինչին կտրականապես դեմ էր Լիբերմանը:  Ուստի, կարծում եմ, այս հրաժարականը իրավիճակային առումով որոշակի հնարավորություն կարող է տալ հակամարտության կողմերին ուղիներ գտնելու պաղեստինա-իսրայելական բանակցությունների արդյունավետության բարձրացման համար, որոնք վերջին շրջանում կրում են իմիտացիոն բնույթ և չունեն լուրջ դրական արդյունքներ: