ԱՄՆ-ի նոր պատժամիջոցներից հետո Իրանը շարունակում է հավատարիմ մնալ միջուկային գործարքին. ԱԷՄԳ

ԱՄՆ-ի նոր պատժամիջոցներից հետո Իրանը շարունակում է կատարել Միջուկային համապարփակ համաձայնագրով ստանձնած իր պարտավորությունները: Այս մասին ասվում է Իրանի միջուկային ծրագրի վերաբերյալ Ատոմային էներգետիկայի միջազգային գործակալության (ԱԷՄԳ) եռամսյա հերթական զեկույցում, որը հրապարակվել է նոյեմբերի 12-ին:

Ըստ Alikonline-ի` զեկույցը հրապարակվել է Իրանի դեմ ԱՄՆ-ի սահմանած նոր պատժամիջոցների ուժի մեջ մտնելուց մեկ շաբաթ անց:

«Չկա որևէ փաստ, որը կվկայի Գերատեսչության հետ համագործակցելու վերաբերյալ՝ Իրանի վարքագծի փոփոխության մասին»,- գրված է զեկույցում:

Ըստ զեկույցում հրապարակված տվյալների` հաշվետու ժամանակահատվածում Իրանի ծանր ջրի պաշարները կազմել են 122.2 տոննա եւ չեն գերազանցել սահմանված չափը՝ 130 տոննան, իսկ հարստացված ուրանի պաշարները կազմել են 149.4 կգ՝ հաստատված 202.8 կգ նորմայի պայմաններում:

Հիշեցնենք, որ Միջուկային համապարփակ համաձայնագրի կայացումից հետո ԱԷՄԳ-ն իր հրապարակած բոլոր զեկույցներում հաստատել է, որ Իրանը կատարում է գործարքի շրջանակներում իր ստանձնած բոլոր պարտավորությունները: