Աղբահանման արշավ` Լիբանանում. մասնակցել են նաև ՀՅԴ անդամներն ու հոգևորականները. լուսանկարներ

Երեկ Լիբանանի Բուրջ Համուդի քաղաքապետարանի կազմակերպությամբ կայացել է «Ճանապարհդ պահիր քո տան պես» աղբահանման արշավը, որին մասնակցել են քաղաքացիներ, մարմնակրթական և բարեսիրական միություններ, կրթական հաստատություններ, Բուրջ Համուդի համայնքները ներկայացնող եկեղեցական հոգևոր հաստատություններ, ինչպես նաև ՀՅԴ Լիբանանի Կենտրոնական կոմիտեի ներկայացուցիչ, պատգամավոր Հակոբ Բագրատունին և երկրում զբոսաշրջության նախարար, ՀՅԴ անդամ Ավետիս Կիտանյանն ու Բուրջ Համուդի քաղաքապետ Մարտիկ Պողոսյանը:

Ըստ Aztagdaily-ի` աղբահանման արշավի նպատակը եղել է ուշադրության արժանացնել քաղաքացու առողջության և կենսոլորտի մաքրության փոխկապակցվածության վրա, զարգացնել քաղաքացու մոտ աղբը հատուկ աղբավայրում նետելու և քաղաքը մաքուր պահելու գիտակցությունը, ինչպես նաև վառ պահել իրար օգնելու մշակույթը:

Լրագրողների հետ զրույցում Հակոբ Բագրատունին նշել է, որ նախաձեռնությանը մասնակցելիս հիշել է Լիբանանի պատերազմի օրերը, երբ ՀՅԴ «Զավարյան» ուսանողական միության երիտասարդները Բուրջ Համուդի պատերը մաքրում էին պաստառներից:

Բագրատունու խոսքով` հատուկ ուշադրության է արժանացել կոյուղիների կեղտաջրի հարցը, և համապատասխան նախարարության հետ աշխատանքներ են տարվում այս հարցին արմատական լուծում տալու համար:

Նշենք, որ արդեն տարիներ է`Լիբանանում աղբահանման լուրջ խնդիր կա: