100 տարի առաջ Հայաստանում սկսեց գործել խնամատարության նախարարությունը. այսօր սոցիալական աշխատողի օրն է

2009 թվականից նոյեմբերի 4-ը նշվում է որպես սոցիալական աշխատողի օր, առաքելություն, որը միտված է անձի, ընտանիքի սոցիալական կարիքների գնահատմանը և դրանց համարժեք լուծումների տրմանը:

Իսկ իրականում՝  դարձյալ 100-ամյակ. 100 տարի առաջ նոյեմբերի 4-ին Հայաստանի Առաջին Հանրապետության խորհրդարանում ձևավորվեց նոր կառավարություն՝ Հովհաննես Քաջազնունու գլխավորությամբ: Հայ Յեղափոխական Դաշնակցության և Հայ Ժողովրդական կուսակցության միջև կնքված ազգային համաձայնության հիմքում ընկած էին նաև նախարարությունների թվի ավելացումը և կառավարության կազմում երկու կուսակցությունների անդամների միջև պաշտոնների հավասարաչափ բաշխումը: 1918թ. նոյեմբերի 4-ին հանրապետության կառավարման համակարգում, ի թիվս այլ մարմինների, առաջին անգամ ասպարեզ եկան կրթության, պարենավորման և խնամատարության նախարարությունները: Նորաստեղծ կառավարության առանցքային՝ վարչապետի, ներքին և արտաքին գործերի, ինչպես նաև խնամատարության նախարարների պորտֆելները տրվեցին Հայ Յեղափոխական Դաշնակցությանը:

«Երկիր»-ի խմբագրակազմը շնորհավորում է սոցիալական աշխատողներին մասնագիտական օրվա կապակցությամբ և մաղթում աշխատանքային հաջողություններ դժվար, բայց կենսական մեծ նշանակություն ունեցող ոլորտում: