Նշել են սոցիալական աշխատողի օրը

Արցախում սոցիալական աշխատողի օրը նշվում է հունիսի 10-ին. այսօր տոնին նվիրված միջոցառում է տեղի ունեցել Ստեփանակերտի մշակույթի եւ երիտասարդության պալատում, որին մասնակցել են ոլորտի աշխատողներ, հանրապետության իշխանությունների ներկայացուցիչներ՝ նախագահ Բակո Սահակյանի գլխավորությամբ։

Միջոցառման ընթացքում նախագահ Բակո Սահակյանը «Երախտագիտություն» մեդալով պարգեւատրել է սոցիալական ապահովության նախարարի առաջին տեղակալ, նախկին նախարար Լենստոն Ղուլյանին, նախարարության ընտանիքի եւ երեխաների հիմնահարցերի վարչության պետ Սամվել Դադայանին եւ «Ստեփանակերտի տուն-ինտերնատ» կազմակերպությանը։

Ի դեպ, ոլորտի մի շարք աշխատողներ պարգեւների են արժանացել նաեւ այսօր առավոտյան Ազգային ժողովում անցկացված միջոցառման ժամանակ։

Տեղեկացնենք, որ ԼՂՀ սոցիալական ապահովության նախարարությունն իրականացնում է 42 ծրագիր, որոնցից օգտվում է բնակչության շուրջ 40 տոկոսը։