Երևան ժամանած անվանի թավջութակահարը Կոմիտաս է կատարել Երևանի մետրոյում

Հայաստանում է ամերիկացի հայտնի թավջութակահար Յան Մաքսինը: Նա առաջին անգամ ելույթ կունենա Երևանում: Երաժշտի համերգը տեղի կունենա հոկտեմբերի 30-ին` ժամը 19:00-ին, Կամերային երաժշտության ազգային կենտրոնում:

Երևանի մետրոպոլիտենում գտնվելու ժամանակ մետրոպոլիտենի աշխատակցուհիներից  մեկն ասել է, որ ճանաչել է նրան, և իր համար մեծ պատիվ է, որ տեսնում է նրան: Ոստիկաններից մեկն էլ ակնարկել է, որ ուզում է լսել Յանի կատարումը՝ հումորով նշելով, թե պետք է Մաքսինը բացի թավջութակի պատյանը՝ իբրև թե ստուգելու համար:

Մաքսինը կատարել է «Սարերի հովին մեռնեմ»-ը:

Նշենք, որ երևանյան համերգի առաջին մասում Յան Մաքսինը հանդես կգա Յոհան Սեբաստիան Բախի թավջութակի մենանվագով և մի շարք հեղինակային ստեղծագործություններով: Երկրորդ մասում նրան կմիանան հայ երաժիշտներ, կհնչեն ստեղծագործություններ 10-ից ավելի լեզուներով, այդ թվում` հայերեն, նաև` Յան Մաքսինի հեղինակային ստեղծագործությունները:

Տեսանյութը՝ Մարկ Հովհաննիսյանի ֆեյսբուքյան էջից: