Անի և Ազատամուտ համայնքներում քրգործեր են բացվելու. Դավիթ Սանասարյան

Ավարտվում են Մարալիկում և 16 այլ համայնքներում ուսումնասիրությունները. կառավարության նիստից հետո լրագրողներին հայտնեց վարչապետին կից պետական վերահսկողական ծառայության պետ Դավիթ Սանասարյանը:

Անդրադառնալով  շրջանառվող լուրերին, թե Անի խոշորացված համայնքի ղեկավարի և Տավուշի մարզի Ազատամուտ համայնքի ղեկավարի նկատմամբ ճնշումներ են գործադրվում, նա ասաց. «Հերյուրանք է, որևիցե ճնշում չի գործադրվել: Ուղղակի տեղեկացրել ենք, որ ուսումնասիրություն ենք իրականացնելու»:

Սանասարյանը նշեց, որ Ազատամուտի գյուղապետի կողմից անիմաստ սկանդալ է  բարձրացվում: «Այնքան այդ գյուղապետի կողմից անիմաստ սկանդալ բարձրացվեց, ես կարեկցանքով եմ վերաբերվում գյուղապետին, որի ընտանիքի անդամներից մեկը  բանտարկության մեջ է, մյուսի վերաբերյալ քրեական գործ է հարուցվում»,- ասաց նա:  

Սանասարյանի խոսքով՝ և' Ազատամուտում, և' Անի համայնքում կան չարաշահումներ: «Կամփոփենք, և կառավարության հաջորդ նիստում կներկայացնեմ նաև դրանք»,- ասաց նա և հավելեց, որ Ազատամուտի 10 տարվա գյուղապետը որևէ հարգանք չի վայելում համայնքի բնակիչների կողմից:

Դավիթ Սանասարյանը պատմեց, որ երբ համայնքապետարան է գնացել, տեսել է` վարագույրները գետնին թափված, և դրանք ինքն է հավաքել: «Հարցրեցի` ինչո՞ւ է այդպես, ասաց, որ` գաք, տեսնեք, որ ցուցարարները եկել են,  այս են արել, որ նրանք իր թշնամիներն են: Ասացի՝ հանգստացեք, եթե դուք թշնամիներ եք ման գալիս, և համայնքի բնակիչները Ձեր թշնամին են, ուրեմն Դուք տեղում չեք»,- ասաց նա:  

Սանասարյանը նաև նշեց, որ առցանց ուսումնասիրություններ են արել, և դրանք ի վնաս համայնքապետի են: «Ամեն ինչը կփաստարկվի համայնքում ֆիզիկապես կատարվելիք գործունեության արդյունքում»,- ասաց նա և նշեց, որ քրեական գործեր են բացվելու և՛ Անի, և՛ Ազատամուտ համայնքներում:

«Արդեն հարուցվել է մեկ քրեական գործ` ամենատարբեր խախտումներով, անարդյունավետ ծախսերով»,- հայտնեց Սանասարյանը, բայց  այլ մանրամասներ չներկայացրեց: