Առաջիկայում ԱԺ պատգամավոր է կալանավորվելու` խոշոր կաշառքի դեպքով. վարչապետի թեկնածու

Նիկոլ Փաշինյանն ԱԺ-ում ելույթի ժամանակ նշեց, որ Հայաստանում տեղի է ունեցել հեղափոխություն, սակայն մարդիկ կան, որ դեռ կաշառք են ստանում: Նա ասաց, որ երեկ ձերբակալվել է հարկային տեսչության պետի տեղակալը:

«Երեկ ձերբակալվում է հարկային տեսչության պետի տեղակալը մեկ միլիոն դրամ կաշառք վերցնելիս: Բացատրեք` ո՞վ է այն մարդը, որն այսօրվա Հայաստանում կաշառք է վերցնում: Բացատրեք` ի՞նչ է տեղադրված նրա գանգատուփի մեջ: Եվ այս առումով ուզում եմ ասել հետևյալը՝ հեղափոխություն եղել է, իշխանփոխություն չի եղել. քանի դեռ պաշտոնյա կա, որը մտածում է` կարող է կաշառք վերցնել, ուրեմն իշխանափոխություն չի եղել, հեղափոխություն է եղել»,- ասաց Փաշինյանը:

Նա տեղեկացրեց, որ առաջիկայում ԱԺ պատգամավոր է կալանավորվելու` խոշոր կաշառքի դեպքով: Նրա հավաստմամբ` ԱԺ պատգամավորի նկատմամբ կա գործ, որն արդեն 100%-ով ապացուցված է: «Արդեն երկու ամիս մենք մեր ձեռքի տակ ունեցած ոչ պաշտոնական թղթի պաշտոնական պատասխանին ենք սպասում, որ օրը մտավ, նախաձեռնություն է լինելու էդ պատգամավորին կալանավորելու վերաբերյալ: Դա կաշառքի գործ է: Այդ երեք ամիսը, որը մի քիչ էլ կապված է օտարերկրյա դիվանագիտական ներկայացուցչության հետ, երեք ամիս է` այդ թուղթը չի գալիս. մի քիչ մեր դեսպանատունը լավ չի աշխատում, մի քիչ միգուցե, չգիտեմ, այդ երկրի հետ որոշ կապեր կան, որ ձգում են: Ամեն օր՝ էսօր, էգուց, լավ, թող մի քիչ էլ ձգեն, մի շաբաթ էլ կարելի է ձգել, մի ամիս էլ, տարբերակ չկա, էդ պատգամավորը կալանավորվելու է: Դա լինելու է երրորդ հանրապետության պատմության մեջ ամենախոշոր կաշառքի դեպքը, որն իր թելերով տանելու է ուրիշ բարձրաստիճան պաշտոնյաների հետևից»,- տեղեկացրեց Փաշինյանը: