Դաշնակցությունը երբեք հատակին չի մնա. Միքայել Մանուկյան. Tert.am

Երևանի ավագանու ընտրությունների Հայ Հեղափոխական դաշնակցության ցուցակը գլխավորող, ՀՀ ԲՆ անտառային կոմիտեի նախագահ Միքայել Մանուկյանը Tert.am-ի հետ զրույցում անդրադառնալով ընտրությունների  արդյունքներին` կարծիք հայտնեց,  որ ընտրություններն ավելի շատ դիտվեցին որպես վարչապետի վստահության հանրաքվե և ժողովուրդը քվեարկեց նախկինների չվերադառնալու օգտին:

«Ես կուզեի ասել, թե նախկինի վերադարձ ինչ է նշանակում, եթե մենք դեմքեր նկատի ունենք` Սերժ Սարգսյան, Ռոբերտ Քոչարյան, դա ուղղակի քիչ հավանական էայսօր, բայց նախկինի վերադարձը նաև այն հոռի երևույթներն են, որոնք այսօր կարծես կամաց-կամաց առաջ է գալիս, օրինակ` «մեր դեմ խաղ չկան», ՀՀԿ-ական համակարգից ՔՊ-ական համակարգի փոխելը, ես սա կանվանեի նախկինի վերադարձ»,-ասաց նա` ներկայացնելով իր անձնական կարծիքը:

-Ինչպե՞ս եք գնահատում Երևանի ավագանու ընտրություններին  Դաշնակցության գրանցած շուրջ 1.62 տոկոս արդյունքը:

-Շատ վատ, իհարկե, բայց դա բացատրելի է: Ընտրությունները քաղաքապետի ընտրություններից շեղվեցին և այլ ուղղությամբ գնացին։ Ընտրությունները դիտվեցին որպես վարչապետի վստահության հանրաքվե: Այդ պարագայում ով էլ լիներ վարչապետի թեկնածուն` նա էլ անցնելու էր:

-Ընթացքում դա չէ՞իք տեսնում, որ վստահություն ունեիք, որ նույնիսկ քաղաքապետ եք լինելու:

- Երբ մարդ մտնում է պայքարի մեջ, նա պետք է վստահությամբ մտնի և դա փոխանցի իր թիմին, բացի այդ,  այդ մասին մենք բազմիցս ասել ենք:

-Բայց ամեն ինչ օրինական դաշտում չէ՞ր, անգամ՝ վարչապետի մասնակցությունն ընտրություներին:

-Ընտրություններից մեր ձեռքբերումը հենց այն եղավ, որ երկիրը լուրջ արդյունքներ ունեցավ թե՛ ընտրատեղամասերում,  թե՛ ընտրախախտումներ չլինելու առումով, թե՛ վարչական լծակ չօգտագործելու առումով: Միակ վարչական լծակը, որն օգտագործվեց, ընտրություններում վարչապետի այսչափ ներգրավումն էր։ Ես երբ ասում եմ` շեղվեց իր ուղուց ընտրությունները, դա նշանակում է, որ քաղաքապետի ընտրություններ չիրականացան, սա ուղղակի վարչապետի վստահության հանրաքվե էր և վարչապետը ստացավ այդ վստահության քվեն: Այնպես ստացվեց, որ  ի սկզբանե լարվեց մթնոլորտը՝ սև ու սպիտակների բաժանվեց, նախկինի վերադարձիր խնդիրը դրվեց: Մեր Երևանի քաղաքացին այդպես ընկալեց ընտրությունը, որ եթե չքվեարկի Նիկոլ Փաշինյանի օգտին, դա կնշանակի նախկինի վերադարձ, որը այդպես չէ: Վարչապետի ասածը դա էր, որ եթե մեզ չեք տալիս, նշանակում է տալիս եք նախկինին: Այստեղ նաև նպաստեց ընտրարշավի ժամանակ գաղտնալսումների փաստը, սա ներկայացվեց, որպես նախկին իշխանությունների հզորացում, և ժողովուրդը խայծը կուլ տվեց և ժողովուրդը քվեարկեց նախկինների չվերադառնալու օգտին:

-Եթե սա վստահության քվե էր, ապա  այդքա՞ն էր ՀՅԴ-ի վստահությունը:

-Խոսքը վարչապետի վստահության քվեի մասին է, այստեղ չես կարող հաշվել ճիշտ քո կշիռը և քվեների չափը: Ինչպես տեսանք՝ ժողովրդի մեծ մասը չի ցանկանում նախկինների վերադարձը, բայց ես կարծում եմ, որ այդ նախկինների վերադարձը արդեն իսկ անհնար է, դրանից առաջ էլ էր անհնար, ուղղակի զուտ մանիպուլացիա և ընտրական հնարքներ էին սրանք, որ այսպիսի քվե ստանան:

-Նախկինների համատեքստում դուք չբացառեցիք Ռոբերտ Քոչարյանի հետ համագործակցությունը, ըստ Ձեզ՝ դրանից հետո Դաշնակցությո՞ւնն էլ որպես նախկին ընկալվեց:

-Հանրության կողմից կարող էր այդպիսի ընկալում լիներ, բայց Դաշնակցությունը ինքնուրույն կառույց է, գործում է ինքնուրույն և ժողովրդի կողքին լինելով կաշկանդված չէ համագործակցել բոլոր քաղաքական ուժերի հետ:

-Այդ թվում Ռոբերտ Քոչարյանի՞, քանի որ նախկիններից վերադառնալու հավակնություն ունի հենց Ռոբերտ Քոչարյանը, որին, ըստ Ձեզ՝ ժողովուրդը չի ընդունում:

-Այդպիսի քաղաքական հարցերը ճիշտ կլինի ուղղել քաղաքական ղեկավարությանը, ես ինչ ասում եմ, իմ անձնական կարծիքն է. նախկինների վերադարձն այլևս անհնար է և ոչ մի ձև դա հնարավոր չէ:

-Բայց դուք էլ եք նախկին, երկար ժամանակ իշխանության մաս եք կազմել:

- Մեր քաղաքական ուժի համար և իշխանության մաս կազմելը, և ընդդիմադիր լինելը ծառայություն է Հայաստանի Հանրապետությանը, իշխանության մաս կազմելը շատ պատասխանատու է և կարծում եմ, որ մեր ընկերները այդտեղ իրենց անելիքը արել են և ոչ մի անգամ կոռուպցիոն սխեմաների մեջ չեն եղել և, այսպես ասած, նախկին վարչախմբի մաս չեն կազմել, զուտ ներկայացել են կոալիցիայի անդամները:

-Անհրաժեշտ եք համարում հնարավորինս շուտ անցկացնել արտահերթ խորհրդարանական ընտրություններ և այս ստացած քվեները որքանո՞վ են թույլ տալիս վստահություն ունենալ, որ կհայտնվեք խորհրդարանում:

-Այս հարցը ևս ուղղեք քաղաքական ղեկավարությանը, բայց  կապ ունի, թե ինչպիսի ընտրություններ կանցկացվեն, եթե վարչապետի քաղաքական ուժը շեշտադրումները նախկինի վերադարձի հետ կապի, կարող է նույն արդյունքները գրանցվեն, բայց սրանք իրական արդյունքներ չեն: Ես կուզեի ասել, թե նախկինի վերադարձ ինչ է նշանակում, եթե մենք դեմքեր նկատի ունենք` Սերժ Սարգսյան, Ռոբերտ Քոչարյան, դա ուղղակի քիչ հավանական է այսօր, բայց նախկինի վերադարձը նաև այն հոռի երևույթներն են, որոնք այսօր կարծես կամաց-կամաց առաջ են գալիս, օրինակ` «մեր դեմ խաղ չկա», ՀՀԿ-ական համակարգից ՔՊ-ական համակարգի փոխելը, ես սա կանվանեի նախկինի վերադարձ: Գրեթե նույն քվեները 1991 թվականին ստացավ Լևոն Տեր-Պետրոսյանը, բայց ի՞նչ ճանապարհով գնաց. հիմք դրվեց ընտրախախտումներին, «ով ՀՀՇ-ի անդամ չի, մեր դեմ է», բոլոր կոռուպցիոն սխեմաների, տնտեսության քայքայման: Ոչ մի երկրում քաղաքացիական այսպիսի շարժումներից հետո երբեք նախկինների վերադարձ չի եղել, Հայաստանն էլ բացառություն չէ: Կարող են լինել արտահերթ ընտրություններ, կարող են չլինել, այստեղ խանգարող բան չկա, թող վարչապետը սկսի խորհրդակցություններ, ամեն մեկն իր մտահոգությունները կներկայացնի և որոշման կգան: Իմ կարծիքով, որքան շուտ լինեն արտահերթ ընտրությունները, այնքան շուտ կպարզվի ջրերը, կամ մեկ անգամ պետք է այնպես խառնվի, կեղտոտվի, որ հետո զուլալվի, կարևորն այն է, որ դրա արդյունքում երկիրը չտուժի, միապետություն, միակուսակցականություն չլինի երկրում:

-Իսկ ջրերը պարզելու արդյունքում կարո՞ղ է Դաշնակցությունը հայտնվել ջրի հատակին:

-Դաշնակցությունը երբեք հատակին չի մնա, Դաշնակցությունը կարող է գործել և՛ խորհրդարանում, և՛ արտախորհրդարանական ուժ լինել: Դրանից Դաշնակցության ուժը և կարողությունը չի պակասի: Հիմա ժողովուրդը կարող է նաև սխալվել, դա խնդիր չէ: Էլի եղել են այդպիսի բաներ, բայց այս պարագայում տնտեսությունը չի կարող տեղից շարժվել, մինչև կայունություն չլինի քաղաքական դաշտում:

-Ամեն դեպքում չե՞ք կարծում՝ խնդիրը Դաշնակցության մեջ է, որ այսքան քիչ ձայն ստացավ, և պետք է վերանայի իր քաղաքականությունը:

-Դաշնակցության էլեկտորատի մի մասը նաև այդպես է մտածում, որ  պետք է անվերապահ սատարել Նիկոլ Փաշինյանին, ժողովրդական շարժմանը: Չեմ կարծում, որ պետք է վերանայենք մեր քաղաքականությունը: