Ակտիվ քաղաքականությունից նախագահ Սարգսյանը երբեք դուրս չի մնա

Սերժ Սարգսյանի հայտարարությունն իր թիմի համար էր. լրագրողների հետ զրույցում ասաց նախկին պատգամավոր Ազատ Արշակյանը` անդրադառնալով ՀՀ նախագահի` «Ալ Ջազիրա»-ին տված հարցազրույցում արած հայտարարությանը:

«Թիմին պետք է ասեր` մնալու եմ մինչև վերջ, որպեսզի փլուզում չառաջանա թիմի մեջ: Եթե թիմը ենթադրում է, որ ինչ-որ ժամանակ հետո լիդերը հեռանալու է, ապա նոր լիդերի փնտրտուք է սկսվում »,- ասաց Արշակյանը` հավելելով` հանրապետականների միջև, որոնց թվում կան օլիգարխներ, բյուրոկրատներ, կոռուպցիոներներ, լուրջ հակասություն կառաջանա հենց իմանան, որ կորցնում են իրենց ղեկավարին:

Ըստ նրա` Սերժ Սարգսյանն աշխատում է  թիմը գործունյա պահել մինչև 2018 թվականը: «Մինչ այդ նա նախագահ է, առանց թիմի ի՞նչ նախագահ: Ուստի հիմա հայտարարում է, որ` սխալ եք հասկացել, համբերեք, կերևա: Բացի դրանից` հիմա նոր դինամիկ փոփոխություններ են սպասվում»,- նշեց Արշակյանը:

Նրա ընդդիմախոս` Հանրապետական խմբակցության քարտուղար Գագիկ Մելիքյանն էլ նշեց, որ խորհրդարանական ձևաչափին անցնելու առաջարկությունը բխում է ժողովրդավարության ճանապարհի ընդունումից: «Նախագահ Սարգսյանը դեռևս անկախության առաջին տարուց եղել է ակտիվ քաղաքականության մեջ, կա ակտիվ քաղաքականության մեջ և դեռևս երկար ժամանակ կլինի: Կարևոր չեն պաշտոնները` բացարձակապես, այստեղ ամեն ինչ բխում է պետական և ազգային շահերից»,- ասաց նա:

Մելիքյանը նշեց, որ Սահմանադրությունը պահանջում է, որ առաջիկայում 2 անգամ լինեն կառավարության հրաժարականներ` 2017 թվականի ապրիլին և 18 թվականի փետրվարին: «Սպասենք, կտեսնենք: Չպետք է ժամանակից առաջ ընկնել, ամեն ինչ կախված է նրանից, թե առաջիկա համապետական ընտրությունների ընթացքում ինչպիսի ձայների կտիրապետեն Հանրապետական կուսակցությունը և մյուս քաղաքական ուժերը»,- նշեց նա` հավելելով`ակտիվ քաղաքականությունից նախագահ Սարգսյանը երբեք դուրս չի մնա: