Սկրիպալների թունավորման մեջ կասկածվողները կոչ են արել Լոնդոնին` գտնել իրական մեղավորներին

Լոնդոնի կողմից ռուս նախկին լրտես Սերգեյ Սկրիպալի և նրա դստեր թունավորման մեջ կասկածվող ՌԴ քաղաքացիներ Ալեքսանդր Պետրովը և Ռուսլան Բոշիրովը հարցազրույց են տվել RT-ին և  Sputnik-ին: Նրանք հերքել են բոլոր մեղադրանքները` հաստատելով, սակայն, որ եղել են Եվրոպայում գործնական նպատակներով և որպես զբոսաշրջիկներ:

Խոսելով` Լոնդոնի մեղադրանքների մասին, թե իբր թունավոր նյութը գտնվել է օծանելիքի սրվակում, նրանք նշել են, որ դա կառաջացներ ոստիկանության և մաքսակետի աշխատակիցների հարցերը:

«Մենք հույս ունենք, որ այդ իրավիճակը կպարզվի»,- ասել է Պետրովը:

Կասկածյալները կոչ են արել Լոնդոնին` գտնել հանցագործության իսկական մեղավորներին:

«Այդ ամբողջ իրավիճակն ուղղակի ֆանտաստիկ և ճակատագրական համընկում է»,- ասել է Պետրովը:

Նրանք, սակայն, հրաժարվել են պատասխանել իրենց փոխհարաբերությունների մասին հարցին:

Հիշեցնենք, որ երեկ ՌԴ նախագահ Վլադիմիր Պուտինը հայտնել էր, որ իրենք գտել են կասկածյալներին, և որ նրանք քաղաքացիական անձինք են: