Սկրիպալների թունավորման մեջ կասկածվող անձինք ռուսական ռազմական հետախուզության աշխատակիցներ են. Մեյ

Մեծ Բրիտանիայի իշխանությունները կարծում են, որ Սկրիպալների թունավորման մեջ կասկածվող անձանց անունները կարող են կեղծանուններ լինել, որ նրանք ռուսական ռազմական հետախուզության աշխատակիցներ են: Այդ մասին խորհրդարանում ելույթի ժամանակ ասել է երկրի վարչապետ Թերեզա Մեյը. հայտնում է РИА Новости-ն:

Հիշեցնենք, որ ավելի վաղ Մեծ Բրիտանիայի դատախազությունը մեղադրանք էր առաջադրել ՌԴ քաղաքացիներ Ալեքսանդր Պետրովին և Ռուսլան Բոշիրովին ռուս նախկին լրտես Սերգեյ Սկրիպալի և նրա դստեր թունավորման գործով:

ՌԴ ԱԳՆ պաշտոնական ներկայացուցիչ Մարիա Զախարովան անդրադարձել է տեղեկատվությանը. հայտնում է ТАСС-ը: «Հրապարակված անունները, ինչպես նաև լուսանկարները, մեզ ոչինչ չեն ասում»,-նշել է նա:

Զախարովան կոչ է արել Լոնդոնին` հրապարակային մեղադրանքներից և տեղեկատվական մանիպուլյացիաներից անցնել գործնական փոխգործակցության` Սկրիպալների գործի հետաքննության համար: