Տավուշի, Սյունիքի, Լոռու մարզերում շարժական մամոգրաֆի միջոցով կանանց կրծքագեղձի հետազոտություններ կանցկացվեն

Այսօր կառավարության նիստում առողջապահության նախարար Արսեն Թորոսյանը ներկայացրեց «Հայաստանի Հանրապետության և Եվրասիական զարգացման բանկի միջև «Առողջապահության առաջնային օղակում ոչ վարակիչ հիվանդությունների կանխարգելման և վերահսկողության կատարելագործում» ծրագրի ֆինանսավորման համար Կայունացման և զարգացման եվրասիական հիմնադրամի միջոցներից դրամաշնորհի տրամադրման մասին» համաձայնագիրը հաստատելու մասին նախագիծը, որով ՀՀ-ին հատկացվում է 1 միլիոն դոլար դրամաշնորհ:

Ծրագրի շրջանակներում նախատեսվում է Տավուշի, Սյունիքի, Լոռու մարզերում իրականացնել կրծքագեղձի մամոգրաֆիկ սքրինինգային հետազոտություններ: Դրանք անցկացվելու են կանանց` 50-ից 60 տարեկան տարիքային խմբում` ապահովելով առնվազն 50 տոկոս ընդգրկվածություն: Ծրագրով նախատեսվում է ձեռք բերել շարժական մամոգրաֆ, ինչպես նաև իրականացնել շարունակական կրթական բժշկական ծրագրեր:

Որոշումն ընդունվեց: