Լավագույն լուծումը կլինի Հայաստանի ու Թուրքիայի միջև առանց նախապայմանների երկխոսության հաստատումը. Դավիթ Տոնոյան

Թուրքիայի և Ադրբեջանի միջև գոյություն ունեցող ռազմական դաշինքն անհանգստության աղբյուր է Հայաստանի համար, քանի որ այդ դաշինքի քաղաքականությունն ուղղված է ընդդեմ Հայաստանի ազգային անվտանգության, ըստ «Արմենպրես»-ի` EADaily-ին տված հարցազրույցում ասել է ՀՀ պաշտպանության նախարար Դավիթ Տոնոյանը՝ պատասխանելով հարցին, թե արդյո՞ք Թուրքիան սպառնալիք է համարվում Հայաստանի անվտանգության համար:

«Անկասկած, վերոնշյալ երկու երկրների համագործակցությունը սպառնալիք է մեզ համար, հատկապես` եթե հաշվի առնենք այն հանգամանքը, որ Ադրբեջանը բացեիբաց սպառնում է Հայաստանին պատերազմով, իսկ Թուրքիան ցանկացած միջոցով աջակցում է Բաքվի ռազմական մտադրությունների կյանքի կոչմանը»,- նշել է Տոնոյանը՝ հիշեցնելով, որ Թուրքիան, առհասարակ ռազմական համագործակցության առումով, Ադրբեջանի գլխավոր գործընկերն է:

Նախարարը հիշեցրել է, որ 2008 թվականին Հայաստանը Թուրքիայի հետ հարաբերությունների կարգավորման փորձ ձեռնարկեց, սակայն պաշտոնական Անկարայի կողմից պատասխան քայլեր այդպես էլ չեղան: «Ի վերջո, գործընթացը կանգ առավ Թուրքիայի ղեկավարության կողմից առաջ քաշված նախապայմանների հետևանքով: Թուրքիան շարունակում է երկկողմ հարաբերությունների կարգավորման հարցը կապել Լեռնային Ղարաբաղի հակամարտության լուծման հետ: Մենք էլ պնդում ենք, որ լավագույն լուծումը կլինի Հայաստանի ու Թուրքիայի միջև առանց նախապայմանների երկխոսության հաստատումը, ինչը թույլ կտա մեր երկրներին քայլ առ քայլ գնալ լիարժեք երկկողմ հարաբերությունների հաստատման ուղղությամբ: Սակայն, հաշվի առնելով նախորդ գործընթացի ձախողումը, այժմ Թուրքիայի հերթն է` հանդես գալու կառուցողական նախաձեռնությամբ»,- հայտարարել է ՀՀ պաշտպանության նախարարը: