Վրաց-ռուսական հսկիչ անցակետը լցրել է հայ վարորդների համբերության բաժակը

Վրաց-ռուսական «Կազբեգի- Վերին Լարս» հսկիչ  անցակետում մեքենաների հսկայական կուտակումներ են: Այդ մասին տեսանյութեր են տարածվում ֆեյսբուքում: Մեքենաները օրերով չեն կարողանում հատել սահմանը, բեռը փչանում է:

Հայ վարորդները բողոքում են վրացական կողմից, որ կարծես գերի լինեն, իրենց մեքենաները օրերով չեն անցնում սահմանը, մինչդեռ հարյուրավոր մեքենաներ առանց հերթ պահելու գալիս անցնում են: Հերթ պահած մեքենան օրերով մնում է, մինչդեռ նրանից հետո եկած 200-րդ մեքենան գալիս անցնում է սահմանը: Հայ վարորդները խնդրում են ՀՀ կառավարությանը միջամտել,  խնդրի մի լուծում տալ: Վարորդների խոսքով` վրացական սահմանին աշխատակիցները իրենց չեն լսում, որևէ հարցի չեն պատասխանում, այլ հորդորում են դիմել սեփական երկրի կառավարությանը:

Հայ վարորդների հետ միասին դժգոհում են նաև օսեթ վարորդները: «Մենք սատարում ենք հայ վարորդների բողոքին, ե՞րբ է ավարտվելու այս ամենաթողությունը: Կարգ ու կանոն հաստատեք վերջապես: Մեծ չարչարանքով աշխատում ենք հերիք չի, այստեղ լրացուցիչ տանջվում ենք: Մենք հասարակ աշխատավորներ ենք, ի՞նչ կապ ունենք այլ խնդիրների հետ: Բոլորը պետք է անցնեն, թե հայերը, թե օսեթները, թե ադրբեջանցիները, բոլորը: Այստեղ մեզ տանջում են, չգիտենք, ինչու»,- ասաց օսեթ վարորդներից մեկը: Հայ վարորդներից մեկն էլ սպառնաց. «Խոստանում եմ, հենց հասնեմ Հայաստան, փակելու եմ Բագրատաշենի անցակետը, տեսնեմ, ոնց են գալու անցնեն: Իրենք կարողանում են փող գռփեն, մենք չենք կարողանու՞մ: Իրենց արյունը մերից կարմիր է՞: Հենց կդժգոհեն, կասենք` գնացեք ձեր կառավարությունից պահանջեք»:

Հատկանշական է, որ հազարավոր սպասող մեքենաները հիմնականում հայկական են, վրացական համարանիշներով մեքենաները արագ անցնում են: Ներկա պահին սպասում են 8000-ին մոտ մեքենաներ: