Երիտասարդները կատարեցին Արամ Մանուկյանի արձանի «ոչ պաշտոնական» բացումը

Արդեն հայտնել ենք, որ Արամ Մանուկյանի արձանի տեղադրման աշխատանքները ոչ միայն չեն դադարեցվել, այլև երկու օրից արձանն արդեն տեղադրված կլինի նախապես որոշված վայրում` Արամի և Նալբանդյան փողոցների հատման կետում՝ մետրոյի «Հանրապետության հրապարակ» կայարանի վերնամասում:

Եվ որպեսզի վերջ դրվի արձանի տեղադրման վայրի հետ կապված խոսակցություններին, այսօր մի խումբ երիտասարդներ կատարեցին, արդեն գրեթե պատրաստի արձանի, իրենց բնութագրմամբ,  ոչ պաշտոնական բացումը:

«Սա առաջին օրն է, որ Արամ Մանուկյանի արձանը վեր է խոյացել ՀՀ մայրաքաղաքի սրտում, դրա համար մենք բոլորս պետք է միմյանց շնորհավորենք և ասենք, որ դեռ կա Արամի տուն-թանգարանի բացման խնդիր, դեռ կա առաջին Հանրապետության թանգարան հիմնելու գաղափարը, որի համար բոլորս պետք է պայքարենք»,- ասում են նրանք:

Նշենք, որ երեկ ուշ երեկոյան հաղորդագրություն էր տարածվել, ըստ որի պետք է դադարեցվեր Արամ Մանուկյանի արձանի տեղադրման աշխատանքները, և որ պետք է հանրային քննարկում սկսվեր վայրի նպատակահարմարության համար: