«Սասնա ծռերի» գործով ամբաստանյալ Արեգ Կյուրեղյանն ազատ արձակվեց կալանքից

Երեւանի քաղաքի ընդհանուր իրավասության դատարանի դատավոր Մեսրոպ Մակյանը քիչ առաջ բավարարեց «Սասնա ծռեր» խմբի անդամ Արեգ Կյուրեղյանի պաշտպանի ներկայացրած միջնորդությունն ու փոխեց Կյուրեղյանի խափանման միջոցը: Նշենք, որ Արեգ Կյուրեղյանի համար ԱԺ «Ելք» խմբակցության պատգամավորներ Հրաչ Հակոբյանը եւ Լենա Նազարյանը ներկայացրել էին անձնական երաշխավորագիր:

Համաձայն մեղադրանքի` Արեգ Կյուրեղյանը 2016թ. հուլիսի 17-ին կազմակերպված խմբի կազմում ապօրինի կերպով ձեռք է բերել, պահել, փոխադրել և կրել հրազեն ու ռազմամթերք, ապա կազմակերպված խմբի կազմում, զենքի գործադրմամբ, կյանքի և առողջության համար վտանգավոր բռնությամբ՝ զավթել և պահել է շենքեր, շինություններ և տրանսպորտի միջոցներ՝ զուգորդված դրանք ոչնչացնելու, վնասելու սպառնալիքով, ինչպես նաև նույն եղանակներով պատանդ է վերցրել և պահել երկուսից ավելի անձանց, որոնք կատարել է զավթածը և պատանդներին ազատելու պայմանով պետությանը գործողություններ կատարելուն հարկադրելու նպատակով:Նույն ժամանակ կազմակերպված խմբի կազմում, կյանքի և առողջությա համար վտանգավոր բռնություն գործադրելով, ինչպես նաև դրա գործադրման սպառնալիքով հափշտակել է հրազեն ու ռազմամթերք, իսկ հանցավոր գործունեությունն ավարտել է 2016թ. օգոստոսի 31-ին ժամը 20-ի սահմաններում, երբ կամովին ազատել է զավթած շենքերը և շինություններն ու տրանսպորտի միջոցները, հրաժարվել իր պահանջներից և հանձնվել իրավապահ մարմիններին։

Հավելենք, որ օրեր առաջ էլ Արեգ Կյուրեղյանի մյուս եղբայրը` Հայկ Կյուրեղյանը, կիսաբաց ռեժիմի ուղղիչ հիմնարկից տեղափոխվել էր բաց ուղղիչ հիմնարկ: