Արտահերթ ընտրություններում հավակնում ենք ստանալ ձայների բացարձակ մեծամասնություն. Նաիրա Զոհրաբյան

Գնալու ենք արտահերթ խորհրդարանական ընտրություններին` ունենալով ամենաբարձր նշաձողը` հավակնել ու ստանալ ձայների բացարձակ մեծամասնություն. խորհրդարանում լրագրողների հետ զրույցում հայտարարեց ԱԺ «Ծառուկյան» խմբակցության պատգամավոր Նաիրա Զոհրաբյանը: «Անգամ առանց ռեյնտինգային ընտրակարգի` մենք հավակնում ենք ստանալ բացարձակ մեծամասնությունը»,- ասաց նա, հավելելով, որ ԲՀԿ-ն պատրաստ է արտահերթ ընտրությունների և' վաղը, և' աշնանը, և' գարնանը:

«Ստեղծված ոչ ստանդարտ ու ադեկվատ քաղաքական իրավիճակի հանգուցալուծումը, ի վերջո, պետք է լինեն արտահերթ խորհրդարանական ընտրությունները»,- հավելեց պատգամավորը:

Հարցին` հնարավո՞ր է, որ դաշինքով գնան արտահերթ ընտրությունների, Զոհրաբյանը պատասխանեց, որ նման հարց չեն քննարկել, միայն համագործակցության խնդիրներ են քննարկել:

Ինչ վերաբերում է ռեյտինգային ընտրակարգին, նա նշեց, որ իրենց դիրքորոշումն անփոփոխ է` պետք է հանել այդ ընտրակարգը: «Ռեյտինգային ընտրակարգը թույլ չի տալիս ընտրություն կատարել ծրագրերի ու գաղափարների միջև»,- ասաց նա:

Պատգամավորը տեղեկացրեց, որ շաբաթ առաջ կրկին իրենց փորձագետներին տվել են հանձնարարություն՝ շատ կարճ ժամկետում նախապատրաստել Ընտրական օրենսգրքի փոփոխություն՝  հանելով ռեյտինգային ընտրակարգը:

«Եթե քաղաքական ուժերի միջև լինի կոնսենսուս, հնարավոր է` մինչև ԱԺ պաշտոնական արձակուրդի մեկնարկը, այն է՝ հուլիսի 15-ը ընդունել Ընտրական օրենսգիրքը: Ամառվա ընթացքում կարող է օրենսգիրքը գնալ Վենետիկի հանձնաժողով՝ փորձաքննության: Իսկ աշնան վերջն ադեկվատ ժամանակահատված է արտահերթ խորհրդարանական ընտրություններ անցկացնելու համար»,- կարծիք հայտնեց Զոհրաբյանը: