Արտահերթ նիստ հրավիրելու համար հավաքվել է անհրաժեշտ 27 ստորագրությունը. Նաիրա Զոհրաբյան

Հոկտեմբերի 29-ին արտահերթ նիստ հրավիրելու համար հավաքվել է պատգամավորների անհրաժեշտ 27 ստորագրությունը: Այս մասին խորհրդարանում լրագրողների հետ զրույցում ասաց ԱԺ «Ծառուկյան» խմբակցության պատգամավոր Նաիրա Զոհրաբյանը:

Ըստ նրա` նախաձեռնությանը միացել են նախատեսվածից շատ թվով պատգամավորներ:

«Միայն ՀՅԴ-ն չի ստորագրել, քանի որ ստորագրելով դառնում են համահեղինակ, բայց նշել են, որ կողմ են քվեարկելու»,- ասաց Զոհրաբյանը` հավելելով ՀՅԴ-ի ստորագրահավաքին չմիանալու պատճառն այն է, որ նրանք ունեն երեք առանցքային առաջարկություն, որը չի ընդունվել Ընտրական օրենսգրքի հեղինակների կողմից: 

Անդրադառնալով նրան, որ ԲՀԿ-ից երեկ բացակայում էր չորս պատգամավոր՝ Գագիկ Ծառուկյանը, Հրանտ Մադաթյանը, Վարդան Ղուկասյանը և Նապոլեոն Ազիզյանը, Զոհրաբյանն ասաց. «Գագիկ Ծառուկյանն ԱԺ-ում էր: Եթե լիներ մեկ ձայնի խնդիր, նա կգար և կքվեարկեր: Վարդան Ղուկասյանը Գյումրիում էր, Հրանտ Մադաթյանը՝ Ղրիմում, իսկ Ազիզյանն առողջական խնդիրներ ուներ»:

Նա վստահեցրեց, որ սպասվելիք արտահերթ նիստում ԲՀԿ-ն բացականեր չի ունենալու:

Նշենք, որ երեկ ԸՕ-ի նոր նախագիծը չընդունվեց 7 կողմ քվեի բացակայության պատճառով: