ՀՄԸՄ-ի բասկետբոլի խմբի փառահեղ հաղթանակը` Լիբանանում. տեսանյութ

Հայ մարմնակրթական ընդհանուր միության Լիբանանի բասկետբոլի խումբը երեկ 74-59 հաշվով դարձել է չեմպիոն` տապալելով մրցակից խմբին` Ռիատի Բեյրութին:

Ըստ Aztagdaily-ի` ՀՄԸՄ-ի հազարավոր համակիրներ խաղից դեռ ժամեր առաջ լցրել են «Աղբալեան- ՀՄԸՄ»- մարզամշակութային համալիրի «Ատոմ և Սելլա Թնճուկեան» դաշտը:

ՀՄԸՄ-ի փառավոր հաղթանակից հետո հազարավոր համակիրներ հավաքվել են Բուրջ Համուդի կենտրոնը, որտեղ տեղի է ունեցել ժողովրդական մեծ տոնախմբություն և հրավառություն:

Տոնախմբությանը ներկա են եղել ՀՄԸՄ-ի Շրջանային վարչության անդամներն ու մարզական պատասխանատուները, ինչպես նաև ՀՅԴ Լիբանանի Կենտրոնական կոմիտեի ներկայացուցիչ, պատգամավոր Հակոբ Բագրատունին, զբոսաշրջության նախարար Ավետիս Կիտանյանն ու նորընտիր պատգամավոր Հակոբ Թերզյանը:

«Հաղթանակի տոնախմբությունն  իսկական հարսանիք էր ՀՄԸՄ-ի համակիրների համար, որոնք ջերմորեն դիմավորեցին նաև հաղթանակից հետո իրենց միացած մարզիկներին` հեռուներից փայլող չեմպիոնական գավաթով»,- տիրող մթնոլորտի մասին գրում է թերթը:

Ինքնաբուխ տոնախմբությունը տևել է մինչև լույս առավոտ:

Շնորհավորում ենք ՀՄԸՄ-ի մեծ ընտանիքին: