Ինձ համար շատ հարմար կլիներ Դավիթ Տոնոյանին տեսնել պաշտպանության նախարար. Վիգեն Սարգսյան

Անձամբ ինձ համար շատ հարմար կլիներ Դավիթ Տոնոյանին տեսնել պաշտպանության նախարար. հրավիրած ասուլիսի ժամանակ հայտարարեց պաշտպանության նախարարի պաշտոնակատար Վիգեն Սարգսյանը` անդրադառնալով «Ելք» խմբակցության պատգամավոր Արարատ Միրզոյանի այն հայտարարությանը, թե Դավիթ Տոնոյանը կարող է լինել իրենց կառավարության պաշտպանության նախարարը:

«Դավիթ Տոնոյանի հետ երկար ճանապարհ ենք անցել: Մենք ավելի քան 19 տարի ծանոթ ենք: Նա ՊՆ-ն շատ լավ գիտի, ունի փորձ, գիտելիքներ: Անձամբ ինձ համար շատ հարմար կլիներ Դավիթ Տոնոյանին տեսնել պաշտպանության նախարար, որովհետեւ նա կունենա նաև համեմատության եզրեր, կկարողանա տեսնել վերջին 1,5 տարվա կատարած աշխատանքն ու արդյունավետությունը»,-ասաց Վիգեն Սարգսյանը:

Նա միևնույն ժամանակ նշեց, որ մի փոքր զարմացած է Տոնոյանի արձագանքից: Ըստ նրա` նախարարը վարձու աշխատող չէ և, անկախ նրանից, կուսակցական է, թե` ոչ, թիմի անդամ է: «Ճիշտն ասած` մի քիչ զարմացած էի Դավիթ Տոնոյանի արձագանքից՝ կապված Արարատ Միրզոյանի առաջարկի հետ: Դա նշանակում է` լինելով կառավարության կազմում, բաց թողնել դռները նման բանակցությունների համար: Ես երբեք նման չեմ արել, դա ինձ համար տաբու է եղել, բայց նա այդպես կողմնորոշվեց, դա նրա անձնական ընտրությունն է եղել»,- ասաց Սարգսյանը: