Վազգեն Սարգսյանը հպարտ կլիներ ՀՀ-ի և մեր բանակի համար. Վիգեն Սարգսյան

Եռաբլուրում լրագրողների հետ զրույցում ՀՀ պաշտպանության նախարար Վիգեն Սարգսյանը նշեց, որ քաղաքական ահաբեկչությունը ցանկացած պետության համար հսկայական հարված է:

Նախարարը դժվարացավ ասել` ինչ կփոխվեր մեր երկրում, եթե այդ ոճրագործությունը տեղի չունենար: «Դժվարանում եմ ասել, թե ինչը կփոխվեր, բայց Վազգեն սպարապետը, եթե այսօր լիներ, շատ հպարտ կլիներ այն առաջընթացի համար, որ տարիների ընթացքում ապրել են ՀՀ-ն և մեր բանակը, իհարկե, մենք էլ շատ ավելի ամուր կզգայինք մեզ` ունենալով ազգային այդպիսի գործչի տեսլականը և մասնակցությունը մեր երկրի կայացման գործում»,- ասաց նա:

Հարցին, թե Հոկտեմբերի 27-ն ո՞ւմ էր ձեռնտու, քանի որ կան մի քանի վարկածներ, Վիգեն Սարգսյանը պատասխանեց, որ ինքը վարկածներ չի մեկնաբանում: «Կարծում եմ, որ ցանկացած հանցագործություն պետք է պարզաբանեն քննիչները, պետք է պարզաբանեն համապատասխան մարմինները: Հոկտեմբերի 27-ն ունեցել է այդպիսի փուլ` իր վայրիվերումներով, և ես հիմքեր չունեմ չվստահելու մեր դատական համակարգի գնահատականին»,- շեշտեց նախարարը: