Ռուզաննա Ազիզյանն ազատվեց աշխատանքից

Ռուզաննա Ազիզյանն ազատվեց աշխատանքից: Երևանի քաղաքապետարանի տեղեկատվության
և հասարակայնության  հետ կապերի վարչությունից տեղեկացնում են, որ հաշվի առնելով Երևանի Մոնթե Մելքոնյանի անվան հ.11 դպրոցի ուսուցիչների և աշակերտների դժգոհությունը տնօրեն Ռուզաննա Ազիզյանի գործունեությունից և այն հանգամանքը, որ ուսուցիչների և աշակերտների վստահությունն ու սերը չվայելող մանկավարժը չի կարող շարունակել աշխատել իրեն մերժող կոլեկտիվի հետ, ՀՀ աշխատանքային օրենսգրքի 112-րդ հոդվածի հիմքով, Երևանի քաղաքապետ Տարոն Մարգարյանի որոշմամբ, Մոնթե Մելքոնյանի անվան թիվ 11 դպրոցի տնօրենը ազատվել է աշխատանքից:

Հիշեցնենք, որ երեկվանից դպրոցում դասադուլ է. ծնողների և ուսուցիչների պնդմամբ՝ Ազիզյանն իրենց թույլ չի տվել մասնակցել Նիկոլ Փաշինյանի ձեռնարկած բողոքի ակցիաներին, իսկ այն ուսուցիչներին, ովքեր մասնակցել են, նրանց իսկ պնդմամբ, տնօրենը պատրաստվում է աշխատանքից ազատել: Բացի այդ՝ ծնողները պնդում են, որ այս տարիներին Ազիզյանը դրամահավաք է իրականացրել, կոպիտ գնահատականներով խոսել երեխաների հետ: 

Ռուզաննա Ազիզյանը Սերժ Սարգսյանի համակուրսեցին է: