Արցախում ականի պայթյունից տուժածներից մեկին կրկին կվիրահատեն, վիճակը ծանր է

Մարտակերտի շրջանի Ղազանչի տեղանքում հակատանկային ականի պայթյունի հետևանքով տուժած` Արցախի Հանրապետության քաղաքացիներ Արամ Մկրտչյանը և Գարիկ Ղահրիյանը շարունակում են բուժում ստանալ Ստեփանակերտի հիվանդանոցում:

Հիվանդանոցից Yerkir.am-ին հայտնեցին, որ Արամ Մկրտչյանի մոտ կա դրական դինամիկա՝ վերքը լավանում է, հետվիրահատական որևէ բարդություն չկա: Նրա վիճակը բժիշկները գնահատում են կայուն բավարար: Հիշեցնենք, որ նրա մոտ առկա էր ներքին արյունահոսություն, փայծաղի պատռվածք. կատարվել էր փայծաղի հեռացում:

Ինչ վերաբերում է  Գարիկ Ղահրիյանին, ապա նրա վիճակը շարունակում է մնալ ծանր: Նա վերակենդանացման բաժանմունքում է և կրկին կվիրահատվի: Հիշեցնենք, որ նրա մոտ կատարվել էր զույգ ստորին վերջույթների ամպուտացիա, ուներ հեմոռագիկ շոկ` երրորդ ու չորրորդ աստիճանի, լրացուցիչ հետազոտությունների արդյունքում ի հայտ են եկել ողնաշարի գոտկային մասի երրորդ, չորրորդ ողերի ու փոքր կոնքի ոսկրերի կոտրվածքներ: