Լոքյանը վարչապետի պաշտոնում Սերժ Սարգսյանին է տեսնում

Կառավարության նիստից հետո լրագրողների հետ ճեպազրույցում տարածքային կառավարման և զարգացման նախարար Դավիթ Լոքյանը, պատասխանելով հարցին, թե ճի՞շտ են մամուլում հրապարակված տեղեկություններն այն մասին, որ ինքը պաշտոնից հեռացվելու է, պատասխանեց. «Մամուլում ամեն ինչ գրում են` պաշտոն են տալիս, վերցնում: Այդ ամենը սկսվեց փոխվարչապետից մինչև մարզպետեր: Առ այսօր ինձ հետ կապված նման հարց չկա: Երեկ մեր կուսակցության ներկայացուցիչը հայտարարեց, որ կուսակցությունում չի քննարկվել պաշտոնների փոփոխության կամ ազատման խնդիր, և նախարարները, որոնք աշխատում են, շարունակելու են աշխատել: Եթե մենք ունենանք նոր կառավարություն, և նոր վարչապետը որոշի, որ ինձ հետ աշխատելու հետ կապված դժվարություններ ունի, դա քննարկման հարց կլինի, բայց այսօր Լոքյան Դավիթը որևէ խնդիր չունի»:

Հարցին, թե ի՞նչ դիրքորոշում ունի վարչապետի պաշտոնում Սերժ Սարգսյանի առաջադրվելու կապակցությամբ, Լոքյանը պատասխանեց, որ  այդ իրավունքն ամբողջապես վերապահված է ՀՀԿ-ին,: Իսկ ինչ վերաբերում է նրան, թե արդյո՞ք ինքը տեսնում է Սերժ Սարգսյանին վարչապետի պաշտոնում, ասաց.  «Այո, տեսնում եմ։ Այսօրվա Հայաստանի բազմաթիվ ֆակտորային պայմանները թելադրում են փորձառու մարդու ներկայություն այդ պաշտոնում»։