Թուրքմենստանում արգելվել է սև մեքենաների շահագործումը

2018-ի հունվարից Թուրքմենստանում արգելվում է սև մեքենաների շահագործումը. ըստ Sputnik-ի` տեղեկացնում է  Хроника Туркменистана պարբերականը:

Երկրի իշխանություններն արգելել էին սև մեքենաների ներմուծումը 2015-ին, և արդեն դրանք տարհանում են փողոցներից ու տանում ճանապարհային ոստիկանության տուգանային կայաններ:

Նոր պահանջների ուժի մեջ մտնելը հանգեցրել է այն բանին, որ մեքենաների գույնը փոխելու ծառայությունը ավտոսպասարկման կետերում թանկացել է 2 անգամ:

Զավեշտն այն է, որ իշխանությունները չեն կարողանում բացատրել, թե ինչու են նման որոշում կայացրել: Մարդկանց հարցերին ու վրդովմունքին պատասխանում են միայն, որ հարկավոր է գնել սպիտակ մեքենաներ, քանի որ «սպիտակ գույնը հաջողություն է բերում»:

Ի դեպ, սպիտակը երկրի նախագահ Ղուրբանգուլի Բերդիմուհամեդովի սիրած գույնն է, և նա սնոտիապաշտ է: