Թովմասյանը հերքում է, որ իր եւ Դավիթ Հարությունյանի միջև խնդիր կա. փաստերն այլ բան են խոսում

Ճիշտ չի լինել ասել, որ նման մոտեցումը հիմք չունի, Դավիթ Հարությունյանն ունի իր կարծիքը. լրագրողների հետ զրույցում ասաց ՀՀ ԱԺ պետաիրավական հարցերի մշտական հանձնաժողովի նախագահ Հրայր Թովմասյանը՝ անդրադառնալով երեկ ԱԺ-ում արդարադատության նախարար Դավիթ Հարությունյանի այն հայտարարությանը, որ ԱԺ-ում քվեարկության ժամանակ իրարանցում առաջացրած «Հայաստանի Հանրապետության դատական օրենսգրքում փոփոխություններ և լրացումներ կատարելու մասին» օրենքի նախագիծը սահմանադրական չէ։

«Բայց այդ դեպքում առաջանալու էր այն մոտեցումը, որ սահմանադրական է, և մեծամասնության հանդեպ կարող էր հնչել մեղադրանք, որ փորձել է հեշտ ճանապարհով գնալ, ու եթե կա վեճ, տարբեր ընկալում, ապա մեծամասնությունը պետք է գնա բարդ ճանապարհով, որպեսզի չմեղադրվի»,- ասաց Թովմասյանը:

Նա նաև հերքեց, որ իր ու Դավիթ Հարությունյանի միջև լարված հարաբերություններ կան, ինչի պատճառով վերջինս փորձել է խորհրդարանական մեծամասնությանը «սխալ հանել» ԱԺ-ում։

«Ես շատ ջերմ ու ընկերական հարաբերություններ ունեմ Դավիթ Հարությունյանի հետ։ Մոռացե'ք, տենց բաներ մի' փնտրեք։ էսօրվա մամուլն էլ է էդպիսի բաներ գրում, չկա այդպիսի բան»,- նշեց Թովմասյանը։