Ռուսաստանի հայերի միությունն անդրադարձել է ԵՄ-Հայաստան համաձայնագրի ստորագրումից հետո ռուսական ԶԼՄ-ներում բարձրացված հիստերիային

Ռուսաստանի հայերի միությունն անդրադարձել է ԵՄ-Հայաստան համաձայնագրի ստորագրումից հետո ռուսական լրատվամիջոցներում բարձրացված հիստերիային և համաձայնագիրը որպես Հայաստանի քաղաքական ուղեգծիի փոփոխություն ներկայացնելու փորձերին:

«Դժվար է հասկանալ՝ ի՞նչն է այստեղ ավելի շատ` անտեղյակությո՞ւնը, թե՞ արտաքին ուժերի շահերը ոչ անշահախնդիր սպասարկելը, որոնք ցանկանում են լարվածություն ստեղծել ռուս-հայկական հարաբերություններում, սեպ խրել ՀԱՊԿ-ի և ԵԱՏՄ-ի դաշնակիցների միջև»,- ասվում է հայտարարության մեջ:

Հայտարարությունում նշվում է, որ բանակցությունների ընթացքում հայկական կողմն իր դաշնակիցներին տեղյակ է պահել կայանալիք որոշման մասին, և ՌԴ պաշտոնական իշխանությունների կողմից որևէ առարկություն չի եղել:

Նշվում է, որ ծայրահեղ անպատասխանատու լրագրողների և քաղաքական գործիչների գործողություններն առաջացրել են համընդհանուր զայրույթ ինչպես Հայսատանում, այնպես էլ Ռուսաստանի բազմամիլիոնանոց հայկական համայնքում՝ որպես երկրների միջև խնդիրներ ստեղծելու և ռուսական հասարակության աչքում Հայաստանի բացասական կերպար ստեղծելու փորձ:

Ռուսաստանի հայերի միությունը հայտարարությունում դիմում է իշխանություններին՝ պահանջելով եթերից հեռացնել «այդ ծախու լրագրողներին, վայ քաղաքական գործիչներին և «փորձագետներին»»:

Նշենք, որ ռուսական Звезда, ОРТ, НТВ հեռուստաալիքների եթերում բուռն քննադատության էր ենթարկվել Հայաստանի քայլը: