Ստամբուլի դատախազությունը ԱՄՆ հյուպատոսարանի ևս մեկ աշխատակցի ձերբակալության որոշում է կայացրել

Հոկտեմբերի 4-ին Ստամբուլում ԱՄՆ հյուպատոսության աշխատակից Մեհմեթ Թոփուզի՝ լրտեսության և գյուլենական համայնքի հետ կապ ունենալու մեղադրանքներով կալանավորվելուց հետո Թուրքիայում ԱՄՆ դեսպանատունը դադարեցրեց վիզաներ տրամադրել Թուրքիայի քաղաքացիներին. տեղեկացնում է Ermenihaber-ը:

ԱՄՆ այս որոշումից հետո չուշացավ պաշտոնական Անկարայի պատասխան քայլը` դադարեցրեց վիզաներ տրամադրել ամերիկացիներին:

Թուրքական «Հյուրիյեթ» պարբերականում այսօր տեղ գտած հրապարակման համաձայն` իրականում թուրք-ամերիկյան ճգնաժամի պատճառը ամերիկյան հյուպատոսության ևս մեկ աշխատակցի ձերբակալությունն է: Բանն այն է, որ նախօրեին Ստամբուլի դատախազությունը որոշում է կայացրել ձերբակալել հյուպատոսարանի ևս մեկ աշխատակցի, որի կինը կասկածվում է գյուլենականների հետ կապ ունենալու մեջ: Այս որոշումից հետո էլ ԱՄՆ-ը դադարեցրել է Թուրքայի քաղաքացիներին վիզաներ տրամադրել: Նշվում է, որ վերոնշյալ անձն առայժմ հյուպատոսարանից դուրս չի եկել ու չի ձերբակալվել: