«Նորք» և «Նուբարաշեն» հոգեբուժական կենտրոն» ՓԲԸ-ները կմիավորվեն

Կառավարության այս շաբաթվա նիստի օրակարգում առողջապահության նախարարությունը ներառել է որոշում` «Նորք» հոգեբուժական կենտրոն» և «Նուբարաշեն» հոգեբուժական կենտրոն» ՓԲԸ-ների միաձուլման ձևով վերակազմակերպելու և «Հոգեկան առողջության պահպանման ազգային կենտրոն» փակ բաժնետիրական ընկերություն ստեղծելու մասին:

Որոշման ընդունումը պայմանվորված է «Նորք» հոգեբուժական կենտրոն» և «Նուբարաշեն» հոգեբուժական կենտրոն» փակ բաժնետիրական ընկերությունների ինքնուրույն գործունեության ոչ նպատակահարմարության և ՀՀ առողջապահության նախարարության ենթակայության կառույցների գործունեության օպտիմալացման անհրաժեշտությամբ:

ՀՀ առողջապահության նախարարի 2017 թվականի մայիսի 16-ի թիվ 1610-Ա հրամանով ստեղծվել է Հոգեբուժական բժշկական օգնության և սպասարկման ծառայության օպտիմալացման վերաբերյալ ներակայացված առաջարկությունների իրականացման նպատակով աշխատանքային խումբ: Կատարված ուսումնասիրությունների արդյունքում՝ խմբի կողմից որոշում է կայացվել  «Նորք» հոգեբուժական կենտրոն» և «Նուբարաշեն» հոգեբուժական կենտրոն» փակ բաժնետիրական ընկերությունների առանձին գործելու աննպատակահարմարության վերաբերյալ:

Նախագծի ընդունման արդյունքում ակնկալվում է առողջապահական համակարգում առկա ռեսուրսների առավել նպատակային օգտագործում և ՀՀ առողջապահության նախարարության ենթակայության կառույցների գործունեության օպտիմալացում: