Հայաստանում առաջին անգամ կցուցադրվի Այվազովսկու «Քաոս. աշխարհի արարում» հռչակավոր կտավը

Այս տարի լրանում է աշխարհահռչակ ծովանկարիչ Հովհաննես Այվազովսկու ծննդյան 200-ամյակը: Հոբելյանն ընդգրկված է ՅՈՒՆԵՍԿՕ-ի` 2017 թվականի հիշարժան տարեթվերի շարքում:

Հայաստանի ազգային պատկերասրահում սեպտեմբերի 15-ից կբացվի «Հովհաննես Այվազովսկի. Արարում» ցուցահանդեսը:

Ազգային պատկերասրահից Yerkir.am-ին տեղեկացրեցին, որ ցուցահանդեսի ընթացքում կներկայացվի հայ մեծ նկարչի ստեղծագործական ուղին` ըստ Հայաստանի ազգային պատկերասրահի գեղանկարչական ու գրաֆիկական հավաքածուների:

 «Հայաստանում առաջին անգամ կցուցադրվի Վենետիկի Մխիթարյան միաբանության հավաքածուի «Քաոս. աշխարհի արարում» հռչակավոր կտավը։ Այվազովսկու «Քաոս» կտավը նրա գլուխգործոցներից մեկն է համարվում: Մեկ տարի պատրաստվել ենք ցուցահանդեսին: Կներկայացվի Այվազովսկու ավելի քան 70 կտավ, որոնք պահվում են պատկերասրահում, այդ թվում` նրա գծանկարները, որոնք նախկինում չեն ցուցադրվել: Եզակի ցուցահանդես է լինելու»,- ասացին պատկերասրահից:

Ի դեպ, ցուցադրությունը կտևի մինչև 2018-ի հունվարի 15–ը: