Կվերականգնվի Հերմոն-Ելփին ջրագծի իշխման տակ գտնվող 10 համայնքների ոռոգման ջրամատակարարումը

Կառավարության այս շաբաթվա նիստի օրակարգում Ջրային տնտեսության պետական կոմիտեն ներառել է կառավարության որոշման փոփոխություն, որով նախատեսվում է ջրային տնտեսության պետական կոմիտեին 2017 թվականի ինն ամսում Հայաստանի Հանրապետության 2017 թվականի պետական բյուջեով նախատես­ված Հայաստանի Հանրապետության կառավարության պահուս­տային ֆոնդից հատկացնել Հայաստանի Հանրապետության Վայոց ձորի մարզի Շատին համայնքում հողի սահքի հետևանքով բարձր ճնշման խողովակաշարն իր նախագծային դիրքին վերականգնելու և խողովակաշարի վթարված հատվածը վերկանգնելու նպատակով 18,240.0 հազ. դրամ բյուջետային ծախսերի տնտեսագիտական դասակարգման «Շենքերի և շինությունների կապիտալ վերանորոգում» հոդվածով, իսկ ՀՀ Արմավիրի մարզի Երվանդաշատ համայնքի տարածքում Արաքս գետի ափի սահմանային 38/3-39 նշանների շուրջ 50 մ երկարությամբ հատվածում ողողված սահմանային ճանապարհի քարալիցքային ամրակապման աշխատանքների նախագծանախահաշվային փաստաթղթերի կազմման նպատակով 691.0 հազ. դրամ` բյուջետային ծախսերի տնտեսագիտական դասակարգման «Նախագծահետազոտական ծախսեր» հոդվածով: Ըստ հիմնավորման, ներկայումս Հերմոն-Ելփին ջրագծի իշխման տակ գտնվող շուրջ 10 համայնքների ջրօգտագործողների ոռոգման ջրամատակարարումը դադարեցված և հետագայում այն վտանգված է:

Փլուզված հատվածի հիմքի երկարությամբ՝ մոտ 60մ, անհրաժեշտ է իրականացնել խոշորաբեկոր քարերից չոր պատի շարվածք /դիտարկվել է նաև բուտոբետոնի պատի և գաբիոնային շարվածքի տարբերակները, որոնք մոտ 30%-ով գերազանցում են քարե շարվածքի արժեքից/: Անհրաժեշտ է նաև մոտ 1.5կմ մոտեցնող ճանապարհի համար կատարել կարգաբերման աշխատանքներ:

Այս աշխատանքները իրականացնելուց հետո անհրաժեշտ է երկրորդ հերթով իրականացնել նաև ցածր ճնշման d=1200մմ խողովակաշարի ուղղման, նախկին դիրքի բերելու աշխատանքները:

Միաժամանակ ՀՀ Արմավիրի մարզի Երվանդաշատ համայնքի տարածքում Արաքս գետի գարնանային հորդացումների ժամանակ սահմանային 38/3-39 նշանների հատվածում տեղի է ունեցել գետի ափի ինտենսիվ ողողում: Ափի ողողված հատվածը տեղում ուսումնասիրվել է ՀՀ արտակարգ իրավիճակների նախարարության, ՀՀ Արմավիրի մարզպետարանի, Արաքս գետի հիմնահարցերի միջգերատեսչական հանձնաժողովի, «Հայջրնախագիծ ինստիտուտ» ՓԲԸ-ի ներկայացուցիչների մասնակցությամբ: Արդյունքում արձանագրվել է, որ Արաքս գետի ափի սահմանային 38/3-39 նշանների շուրջ 50 մ երկարությամբ հատվածում ողողվել է սահմանային ճանապարհի քարալիցքային ամրակապումը, որը սպառնում է ողողել ճանապարհը և հարակից տարածքները: Համապատասխան միջոցառումների իրականացման համար պահանջվող կապիտալ ներդրումների նախնական արժեքը «Հայջրնախագիծ ինստիտուտ» ՓԲԸ-ի ներկայացուցիչների կողմից գնահատվել է շուրջ 23,033 հազար դրամ: Հաշվի առնելով վերոնշյալը, աշխատանքների նախագծանախահաշվային փաստաթղթերի կազման համար անհրաժեշտ կլինի 691.0 հազար դրամ (23,033.0*3%/100):

Որոշման նախագծի ընդունմամբ հնարավոր կլինի իրականացնել Հերմոն-Ելփին ջրագծի իշխման տակ գտնվող շուրջ 10 համայնքների ջրօգտագործողների ոռոգման ջրամատակարարումը, ինչպես նաև Արաքս գետի ափի սահմանային 38/3-39 նշանների շուրջ 50 մ երկարությամբ հատվածում ողողված սահմանային ճանապարհի քարալիցքային ամրակապման աշխատանքների նախագծանախահաշվային փաստաթղթերի կազմումը: