Օպերայի թատրոնի տնօրենի պաշտոնը` նշանակովի՞

Ալ. Սպենդիարյանի օպերայի և բալետի ազգային ակադեմիական թատրոնի տնօրենի ընտրության մրցույթ հայտարարելու համար մշակույթի նախարարությունը մինչև օգոստոսի 3-ը ժամանակ ուներ, սակայն մրցույթն այդպես էլ չի հայտարարվել:

Yerkir.am-ը հետաքրքրվեց մշակույթի նախարարությունից, իսկապե՞ս մրցույթ չի հայտարարվել, և ո՞րն է պատճառը: Ի պատասխան ՀՀ մշակույթի նախարարության անձնակազմի կառավարման բաժնի պետ Էլմիրա Մուրադյանը նշեց, որ, այո, նախարարությունը մրցույթ չի հայտարարել:

«Խնդիրն այն է, որ կառավարության որոշման մեջ օպերայի թատրոնի տնօրենի մրցույթի անցկացման ձևի փոփոխություն պետք է արվեր, այսինքն` արդեն իսկ արվել է այդ փոփոխությունը: Ըստ այդմ` տնօրենը պետք է նշանակվի, այլ ոչ թե մրցույթով ընտրվի»,-ասաց նա` հավելելով, որ կառավարության որոշումն արդեն իսկ ուժի մեջ է մտել:

Մշակույթի նախարարությունից տեղեկացրեցին նաև, որ շուտով այդ մասին հաղորդագրություն կտարածեն:

Հիշեցնենք, որ փետրվարի 4-ին, մշակույթի նախարար Արմեն Ամիրյանի հրամանով, թատրոնի տնօրեն Անդրանիկ Արզումանյանը նշանակվել էր նախարարի խորհրդական:  Իսկ թատրոնի տնօրենի ժամանակավոր պաշտոնակատար էր նշանակվել Կոնստանտին Օրբելյանը: