Զոհված զինծառայողի ծնողները հաշմանդամություն ունեն, անաշխատունակ են

Տեղեկացրել էինք, որ երեկ ՊԲ արևելյան ուղղությամբ տեղակայված զորամասերից մեկի պահպանության տեղամասում, հակառակորդի կողմից արձակված կրակոցից, մահացու հրազենային վիրավորում է ստացել ՊԲ զինծառայող, 1997թ. ծնված Վազգեն Ժիրայրի Պողոսյանը:

Զինծառայողը Վայոց ձորի Հորբատեղ գյուղից էր: Հորդատեղի գյուղապետը` Գագիկ Սանդրոսյանը, Yerkir.am-ի հետ զրույցում նշեց, որ տղան արդեն 1,5 տարի էր, ինչ ծառայում էր:

«Զինծառայողի ընտանիքն անապահով է: Վազգենի հայրն ու մայրը հաշմանդամություն ունեն, անաշխատունակ են: Տղան երկու քույր ունի, երկուսն էլ ամուսնացած են: Տարիներ առաջ դժբախտ դեպք էր տեղի ունեցել` պատահաբար որսորդական հրացանով կրակել էին Վազգենի եղբոր վրա, ով մահացել էր: Ընտանիքը հիմա ծանր դրության մեջ է հայտնվել, չգիտեմ: Հույսը Վազգենի վրա էին դրել, որ գար, աշխատեր ու պահեր ընտանիքը...»,-ասաց Սանդրոսյանը: