Չենք ասել՝ այս օրենքը պետք չէ. Արծվիկ Մինասյան

ՀՀ բնապահպանության նախարար Արծվիկ Մինասյանն այսoր խորհրդարանում լրագրողների հետ զրույցում անդրադարձավ Սևանա լճից լրացուցիչ 100 մլն խորանարդ ջուր բաց թողնելու նախագծին: Նա նշեց, որ կարևոր է, որպեսզի Սևանից ջրառ իրականացնելը կամ Սևանից օգտվելու կանոնները օրենքով հստակ սահմանվեն: Նախարարն ընդգծեց, որ թեև բազմաթիվ օրենսդրական կանոններ ունենք, բայց դեպքեր կան, որ կարգավորված չեն:

«Սևանից ջուր վերցնելը և Սևանին վերադարձնելը ի՞նչ կանոններով, ի՞նչ մեխանիզմներով պետք է իրականացվի: Մենք այս կարգավորումները դեռ լիարժեք չունենք, և մեր նպատակն է, որպեսզի օրենսդրական վերանայումների արդյունքում նաև այսպիսի հարցերը կարգավորենք»,- ասաց նա, ապա հավելեց, որ կոչով դիմել է նաև հասարակական սեկտորին, որպեսզի ներգրավվեն այսպիսի քննարկման մեջ:

Դիտարկմանը՝ ի վերջո, ինքը դեմ է եղել այս նախագծին, Մինասյանը պատասխանեց, որ ցանկացած որոշում, որպեսզի համապատասխանի կայունության սկզբունքին, պետք է երեք պարամետր հաշվի առնի՝ էկոլոգիական, տնտեսական և սոցիալական:

«Ամեն ոլորտի համար պատասխանատու գերատեսչությունները տվել են իրենց տեսակետները, որին համապատասխան էլ կայացվել է որոշումը: Այնպես որ` այդ որոշումը դիտարկել որպես ինտրիգ կառավարության անդամների միջև կամ կոալիցիայի մեջ ճեղք գտնել, սխալ է»,- շեշտեց նա:

Նախարարն ընդգծեց, որ իրականում շատ լավ է, որ արդյունավետ քննարկում է տեղի ունենում, արդյունավետ տեսակետների բախում է տեղի ունենում, որպեսզի որոշում կայացնողն էլ նկատի առնի այդ ամենը:

Մինասյանը նշեց, որ դեմ չի եղել 100 մլն խորանարդ հավելյալ ջրի բացթողնմանը Սևանա լճից: «Մենք ասել ենք շատ պարզ բան` օրենքը նախատեսում է 170, բայց նաև բացառություն է նախատեսել հավելյալ ջրառ իրականացնելու մասով, սակայն շատ կարևոր է, որ այդ հավելյալը հիմնավորված լինի օրենքով նախատեսված հիմքերով հստակ ձևակերպման հիման վրա: Այն լինի վերահսկելի տիրույթում և, իհարկե, ռիսկ չպարունակի էկոհամակարգի տեսակետից»,- ասաց նա, ապա նշեց, որ արել է ընդամենը սահմանադրական իր պարտականությունը՝ էկոհամակարգի վերաբերյալ տվել է հնարավոր բացասական ազդեցության մասին կարծիք, և որ բուն օրենքի վերաբերյալ չեն ասել` ոչ, այս օրենքը պետք չէ:

«Մենք ինչո՞ւ ենք ասել, որ հնարավոր է բացասական զարգացում, որովհետև նախորդ երկու փորձը ցույց է տվել` բացասական հաշվեկշռում ենք հայտնվել Սևանի մասով: Դրա համար տվել ենք այս հավանականությունը` միևնույն ժամանակ, շատ կարևոր համարելով այն, որ դրական հաշվեկշռի ապահովումը, այնուամենայնիվ, պետք է լինի այս գործողության տրամաբանական ընթացքը»,- եզրափակեց նախարարը: